खिमराज चालिसे,चंडिगढ ।
अन्तर्राष्ट्रिय ऐक्यवद्धताको लागि नेपाली जनताको मञ्च हिसारको आयोजनामा नेकपाको ७३औँ पार्टी स्थापना दिवस तथा विश्व सर्वहारा वर्गका महान नेता एवम् अक्टुबर क्रान्तिका नायक लेनिनको १५३ औँ जन्मदिवस मनाइएको छ ।
विश्वव्यापी रुपमा फैलिरहेको कोरोना महामारीको बाबजुद पनि प्रत्यक्ष रुपमा कार्यक्रम सम्पन्न गरिएको थियो । सभामा वक्ताहरुले अन्तर्राष्ट्रिय रुपमा रक्षात्मक अवस्थामा रहेको मार्क्सवाद लेनिनवाद तथा माओविचारधाराको संरक्षण गर्दै साम्राज्यवादी, विस्तारवादीहरुसँग मात्र होइन कम्युनिस्ट आन्दोलन भित्रका सबैखाले अवसरवादबाट पनि पार्टी र सिद्धान्तको रक्षा गर्नुपर्नेमा जोड दिएका थिए ।
पार्टी स्थापना दिवस र लेनिन जयन्तीको महत्वबारे क्षेत्रीय समितिका तारा सोमारेले प्रशिक्षण दिनु भएको थियो । बाबुराम शर्माको सञ्चालनमा तथा नन्दबहादुर लम्तरीको अध्यक्षतामा भएको कार्यक्रममा हुमाकान्त अधिकारीले स्वागत गर्नुभएको थियो ।
त्यस्तै, नेपाली जनताको मञ्च रोपडको आयोजनामा पनि पार्टी स्थापना दिवस तथा लेनिन जन्मदिवस मनाइएको छ । मूल प्रवाहका केन्द्रीय सदस्य तथा सुदूरपश्चीमोत्तर क्षेत्रीय अध्यक्ष प्रेम सापकोटा, महिला क्षेत्रीय विभागकी अध्यक्ष सिता सापकोटा, क्षेत्रीय सदस्य शिवलाल लामिछाने, मन्जु थापा, कलाधर सापकोटा, लक्ष्मी गुरुङ र मनिराम सापकोटाले कम्युनिष्ट पार्टीको महत्व तथा लेनिनले दिएको योगदानबारे चर्चा गर्नुभएको थियो ।
सचिव बिष्प्णु गुरुङको सञ्चालनमा तथा कावा अध्यक्ष दयाराम लामिछानेको अध्यक्षतामा सम्पन्न कार्यक्रममा नगर कोषाध्यक्ष भक्तबहादुर थापाले स्वागत गर्नुभएको थियो ।
