काठमाडौं । नक्कली पीसीआर रिपोर्ट तयार पार्ने काठमाडौंको एक ल्याबमा प्रहरीले छापा मारेको छ । नक्कली पीसीआर रिपोर्ट तयार गर्ने सिनामंगलस्थित सुरिया हेल्थकेयर प्रालिमा छापा मारेर ८ जनालाई प्रहरीले पक्राउ गरेको छ ।
मंगलबार दिउँसो छापा मारेर अपराध महाशाखाको टोलीले प्रालिका कर्मचारी र बिचौलियालाई पक्राउ गरेको महाशाखा प्रमुख एसएसपी चन्द्रकुवेर खापुङले जानकारी दिनुभयो । वैदेशिक रोजगारीमा जाने व्यक्तिहरुलाई नक्कली रिपोर्ट बनाइदिने गरेको पाइएको महाशाखाले जनाएको छ।
पक्राउ पर्नेमा सञ्चालक झापा घर भएका ४५ वर्षीय प्रकाश रायमाझी भन्ने चित्रबहादुर रायमाझी, सप्तरीको राजविराजका ३२ वर्षीय प्रमोदकुमार यादव, महोत्तरीको गौशालाका ५० वर्षीय प्रदिपकुमार गिरी, २५ वर्षीय अमनकुमार यादव, २२ वर्षीय बादल मिरिङछिङ, बिराटनगरका ३२ वर्षीय बजेश पोख्रेल, दोलखाका २२ वर्षीय सरोज क्षेत्री र सप्तरीका ४४ वर्षीय डा। खेलानन्दप्रसाद सिंह रहेका छन्।
सो ल्याबले नौ हजार रुपैयाँ लिएर स्वाब नै नलिइ पीसीआर रिपोर्ट दिने गरेको प्रहरीले जनाएको छ । ल्याबबाट चार थान नक्कली रिपोर्टसमेत बरामद भएको छ। केही प्रक्राउ परेका उपर थप अनुसन्धान भइरहेको प्रहरीले जनाएको छ ।
विमानस्थलबाटै फर्काइए यात्रु
यसबैबीच नक्कली पीसीआर रिपोर्ट लिएर विदेश जान लागेको आशंकामा विमानस्थलबाट १२२ यात्रुलाई फर्काइएको छ । विमानस्थल हेल्थ डेस्कमा चेकजाँचका क्रममा सिल गरिएको सुरिया ल्याबबाट पीसीआर रिपोर्ट लिएको पाइएपछि फर्काइएको विमानस्थल सुरक्षा कार्यालयले जनाएको छ ।
फर्काइएको यात्रु बुधबार बिहान एयर अरेबिया, सलाम एयर र जजिरा एयरबाट उड्न लागेका थिए । यीमध्ये ७२ जना नेपाली, ४९जना भारतीय र १ जना पाकिस्तानी नागरिक हुन् ।
