काठमाडौं । गएको २४ घण्टामा एक हजार ७३६ जनामा कोरोना भाइरसको संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार आज ८ हजार ७३८ नमुना परीक्षण गर्दा १७ सय ३६ जनामा संक्रमण पुष्टि भएको हो ।
पीसीआर विधिबाट गरिएको परीक्षणका क्रममा १६ सय ६७ र एन्टिजेन विधिबाट ६९ जनामा संक्रमण पुष्टि भएको मन्त्रालयले जनाएको छ । यस्तै, आज तीन जनाको मृत्यु भएको छ । गएको २४ घण्टामा थप ११ जनाको मृत्यु भएको रिपोर्ट प्राप्त भएको मन्त्रालयले जनाएको छ । यो सँगै नेपालमा कोरोनाबाट मृत्यु हुनेको संख्या तीन हजार १०२ पुगेका छ ।
उपचारको सुनिश्चितता नभइ रिफर नगर्न निर्देशन
यसैबीच स्वास्थ्य तथा जनसंख्या मन्त्रालयले बेड तथा उपचारको सुनिश्चितता गरेर मात्रै बिरामीलाई अन्य अस्पतालमा रिफर गर्न अस्पतालहरुलाई निर्देशन दिएको छ ।
मन्त्रालयले मंगलबार सूचना प्रकाशित गरी ‘कोभिड–१९ को बढ्दो संक्रमणसँगै नियमित स्वास्थ्य सेवा तथा आकस्मिक सेवा प्रवाहमा सर्वसाधारणमा पर्न गएको कठिनाइप्रति गम्भीर ध्यानाकर्षण भएको’ जनाएको छ ।
सूचनामा भनिएको छ, ‘कुनै पनि अस्पतालमा आइपुगेका बिरामीहरुको आकस्मिक उपचार व्यवस्थापन गरेर तथा अन्य अस्पतालमा पठाउनुपर्ने अवस्थामा बेडको उपलब्धता र उपचार पाउने सुनिश्चितको समन्वय गरेर मात्रै पठाउन हुन सबै अस्पतालहरुलाई निर्देशन गरिन्छ।’
