काठमाडौं । नेपाल कम्युनिष्ट पार्टी (मसाल) का महामन्त्री मोहनविक्रम सिंह ८७ औँ वर्षमा प्रवेश गर्नुभएको छ । विस. १९९२ सालमा जन्मनुभएका सिंह २००७ सालदेखि नै राजनीतिमा सक्रिय हुनुभएको थियो ।
उहाँ २०१० सालमा कम्युनिष्ट पार्टीको सदस्यता लियदेखि निरन्तर कम्युनिष्ट आन्दोलनको मूल प्रवाहको रुपमा रहनुभएको छ । महामन्त्री सिंह नेपालको कम्युनिष्ट आन्दोलनका समकालिन नेताहरुमध्ये सबैभन्दा अग्रज नेता हुनुहन्छ ।
उहाँ कम्युनिष्ट आन्दोलनमा विचार निर्माता र त्यागी नेताका रुपमा चिनिनुहुन्छ । सधैँ चर्चामा रहिरहने सिंहले लाभको पदको आशा भने कहिल्यै गर्नुभएको छैन ।
नेता सिंह ८७ वर्षको उमेरमा समेत युवाहरु जस्तै राजनीति र साहित्य लेखनमा सक्रिय हुनुहुन्छ । नेपालको प्रगतिवादी साहित्यमा समेत सिंहको अग्रणी भूमिका रहँदै आएको छ । सिंहलाई ८७ औँ वर्ष प्रवेशको अवसरमा सामाजिक सञ्जालमार्फत हजारैं शुभचिन्तकहरुले शुस्वास्थ्य र दीर्घजीवनको कामना गरेका छन् ।
सिंहकी पत्नी एवम् राष्ट्रिय जनमोर्चाका उापध्यक्ष दुर्गा पौडेलले उहाँको जन्मोत्सवको शुभकाना दिँदै फेसबुकमा लेख्नुभएको छ, ‘मोहनजी आज ८६ वर्ष पार गरेर ८७ वर्षमा लाग्नु भयो । उहाँको संघर्षशील जीवनको सहयात्री हुन पाउनु र उहाँको कर्ममा सहयोग गर्न पाउनु मेरो लागि जीवनकै सबैभन्दा सुखद पक्ष हो । मलाई आसा र पूर्ण विश्वास छ उहाँ सँगको सहयात्रा अझै धेरै टाढासम्म हुनेछ । हजुरको ८७ औं वर्ष प्रवेश अझ धेरै सुखद र महत्वपूर्ण होस् । देश, जनता र पार्टीप्रति अझ धेरै योगदान दिन सक्नुहोस् । हजुरको सु–स्वास्थ्य र दीर्घायुको कामना सहित जन्म दिनको धेरै–धेरै शुभकामना ।’
