काठमाडौँ । नेकपा (मसाल) का प्रवक्ता रामप्रकाश पुरीले अखिल नेपाल जनजाति सम्मेलन र जातीय समता समाजले सामाजिक चेतनाको आन्दोलन चलाएको बताउनुभएको छ ।

अखिल नेपाल जनजाति सम्मेलन र जातीय समता समाजका बागमती प्रदेश समितिको आयोजनामा २०७८ वैशाख ३ गते बागबजारमा आयोजित चौतिसौँ स्थापना दिवसलाई सम्बोधन गर्दै प्रवक्ता पुरीले यस्तो अभिव्यक्ति दिनुभएको हो ।

‘नेपालमा संस्थागत रूपमा सामाजिक चेतनाको आन्दोलन अरू कसैले चलाएनन्’ प्रवक्ता पुरीले भन्नुभयो– ‘अखिल नेपाल जनजाति सम्मेलन र जातीय समता समाजले मात्रै सामाजिक चेतनाको आन्दोलन चलाए ।’

उहाँले गणतान्त्रिक व्यवस्था आए पनि जातीय विभेदलाई यथावतै राख्ने संस्कार अहिले पनि रहेको बताउनुभयो ।

‘रुकुम पश्चिमको चौरजहारी काण्डमा तत्कालीन सत्तारूढ नेकपा र नेपाली काङ्ग्रेसले उक्त घटनालाई ढाकछोप गर्न खोजेका थिए’ उहाँले भन्नुभयो– ‘राष्ट्रिय जनमोर्चाका केन्द्रीय उपाध्यक्ष, प्रवक्ता तथा प्रतिनिधि सभाका सांसद दुर्गा पौडेलले मात्रै चौरजहारी काण्डको विरोधमा आवाज उठाउनुभयो ।’

उहाँले अखिल नेपाल जनजाति सम्मेलन र जातीय समता समाजले सबै खाले कुरीति, परम्परा र भेदभावका विरुद्ध मात्र होइन, एनजिओकरण जनविरोधी भूमिका, जातिवाद र साम्राज्यवादको विरुद्ध सङ्घर्ष गरिरहेको स्मरण गर्नुभयो ।

कार्यक्रममा मन्तव्य राख्दै अखिल नेपाल जनजाति सम्मेलनका अध्यक्ष निमबहादुर बुढाथोकीले २०४४ सालमा पहिले जनजाति र दलित समुदायको एउटै सङ्गठन निर्माण भएकोमा व्यवहारमा जाँदा अलग–अलग सङ्गठन खोल्नुपर्ने आवश्यकता महसुस भएको बताउनुभयो ।

उहाँले जनजाति सम्मेलन र समता समाज आकर्षक नाम भएको बताउँदै भन्नुभयो– ‘अखिल नेपाल जनजाति सम्मेलन र जातीय समता समाजको नाममा जातिवादको गन्ध आउँदैन ।’

कार्यक्रममा अखिल नेपाल कानुन व्यवसायी सङ्घका महासचिव लक्ष्मणदेव पाण्डे, प्रगतिशील पत्रकार सङ्घका केन्द्रीय सदस्य प्रकाश थापामगर, अखिल (छैठौं) का पूर्व केन्द्रीय सदस्य भीष्म जोशी, नेकपा (मसाल) काठमाडौँका प्रवक्ता जगत्प्रसाद रेग्मी, राष्ट्रिय जनमोर्चा काठमाडौँका सचिव छवि खनाल, नेपाल पत्रकार महासङ्घ उपत्यका प्रदेश समितिका सदस्य घनश्याम अधिकारी (वैरागी जेठा) र अखिल (छैठौं) काठमाडौँका उपाध्यक्ष धु्रव बस्यालले मन्तव्य राख्नुभएको थियो ।

जातीय समता समाजका महासचिव भक्त विश्वकर्माले कार्यक्रमको विषयवस्तुमाथि प्रकाश पार्दै स्वागत मन्तव्य व्यक्त गर्नुभएको उक्त कार्यक्रमको अध्यक्षता अखिल नेपाल जनजाति सम्मेलनका अरुण थिङले र सञ्चालन समता समाजका केन्द्रीय सदस्य गोपाल बराइलीले गर्नुभएको थियो ।