काठमाडौं । पछिल्लो समय देशका विभिन्न भागमा कोरोना संक्रमण बढ्दै गएको छ । कोरोनासँग मिल्दोजुल्दो लक्षण देखिने गरी विद्यार्थीहरु बिरामी पर्न थालेपछि कैयौं स्थानमा विद्यालय बन्द हुन थालेका छन् ।

यसै क्रममा नेपालगञ्जस्थित भेरी अस्पतालमा उपचाररत एक जनाको कोरोनाका कारण ज्यान गएको छ भने ४९ संक्रमितको अवस्था गम्भीर बन्दै गएको छ । अस्पतालको कोभिड वार्डमा उपचाररत ७४ जना सङ्क्रमितमध्ये ४९ जनाको अवस्था गम्भीर बनेको र उनीहरु मध्ये सात जनाको भेन्टिलेटरमा उपचार भइरहेको जिल्ला कोभिड सङ्कट व्यवस्थापन केन्द्र बाँकेका स्रोत व्यक्ति तेज वलीले जानकारी दिनुभएको छ ।

मृत्यु हुनेमा सुर्खेतको गुर्भाकोट नगरपालिका–१३का ३१ वर्षीय पुरुष रहेका छन् । एक हप्ताअघि मात्र भारतबाट फर्किएका उनलाई स्वास्थ्यमा समस्या देखिएपछि गरिएको पिसिआर परीक्षणमा कोरोना पुष्टि भएको थियो।

कोरोनाको लक्षणसहित १०२ जना विद्यार्थी बिरामी
यता, दोलखाको बिगु गाउँपालिका–८ खोपाचाँगुमा रहेको हिमालय माविका एक सय भन्दा धेरै विद्यार्थी र शिक्षकमा एकसाथ रुघाखोकी र ज्वरोको समस्या देखिएको छ। कोरोनासँग मिल्दो लक्षणसहित रुघाखोकी र ज्वरोले शिक्षक विद्यार्थी बिरामी पर्न थालेपछि बिहीबारदेखि विद्यालय अनिश्चित कालका लागि बन्द गरिएको छ।

जुम्लामा अज्ञात रोगले बिरामी हुँदै विद्यार्थी
अज्ञात रोगले जुम्लाका विद्यार्थी धमाधम बिरामी परेका छन् । वायु प्रदूषण र मौसमी रुघाखोकी फैलिँदा जिल्लाका तातोपानी गाउँपालिका–७ मा रहेको ताम्तीगाउँ प्रभावित भएको छ । मौसमी रुघाखोकी फैलिँदा स्थानीय बालबालिका बढी प्रभावित भएका छन् । गाउँपालिकास्थित जनजागृति माध्यमिक विद्यालयका २६ विद्यार्थी एकैदिन बिरामी परेका छन् ।

विद्यालयमा वार्षिक परीक्षा चलिरहेका बेला विद्यार्थी एकाएक बिरामी पर्न थालेपछि विद्यालय अहिले बन्द गरिएको छ । उनीहरुमा टाउको दुख्ने, ज्वरो आउने र पेट दुख्ने लक्षण देखिएको जनजागृति माविका प्रधानाध्यापक जनक रावतले बताउनुभयो । बिरामी विद्यार्थीलाई विद्यालय प्रवेशमा रोक लगाइएको छ । विद्यार्थी बिरामी भएपछि गाउँ नै त्रसित अवस्थामा छ । समयमै रोगको पहिचान र निदान नभए गाउँ नै सङ्क्रमण हुने डर देखिएको वडाध्यक्ष मक्करबहादुर रावतले बताउनुभयो ।

काठमाडौंमा संक्रमित देखिएका विद्यालय एक साता बन्द
काठमाडौं महानगरभित्र कोरोना संक्रमित फेला परे विद्यालयहरु एक हप्ता बन्द हुने भएका छन् ।महानगरपालिकाले शुक्रबार सूचना प्रकाशित गरी शिक्षक, विद्यार्थी वा कर्मचारी मध्ये कसैलाई संक्रमण भएको भएमा कम्तीमा एक साता विद्यालय बन्द गर्ने निर्णय गरेको जनाएको छ ।

महानगरले संक्रमित फेला नपरेका विद्यालयहरु भने अभिभावकको सहमतिमा जनस्वास्थ्य मापदण्डको कडाईका साथ पालना गरेर सञ्चालन गर्न आग्रह गरेको छ।