काठमाडौं । नेपालमा पछिल्लो २४ घण्टामा ५१७ जनामा कोरोना भाइरसको संक्रमण पुष्टि भएको छ।
मंगलबार स्वास्थ्य तथा जनसंख्या मन्त्रालयले दिएको जानकारी अनुसार ५ हजार २०३ को पीसीआर परीक्षण गर्दा ५१७ जनामा कोरोना संक्रमण पुष्टि भएको हो। पीसीआर परीक्षणबाट ४६० र एन्टिजेल परीक्षणबाट ५७ जनामा कोरोना पुष्टि भएको हो।
योसँगै नेपालमा कोरोना संक्रमितको कुल संख्या २ लाख ८० हजार ९८४ पुगेको छ भने आज देशभरमा सक्रिय संक्रमितको संख्या ३ हजार ६०८ रहेको छ। मन्त्रालयका अनुसार पछिल्लो २४ घण्टामा १५३ जना कोरोना संक्रमित निको भएसँगै निको हुनेको संख्या २ लाख ७४ हजार ३१८ पुगेको छ।
यसैगरी पछिल्लो २४ घण्टामा रिपोर्ट प्राप्त भएका मृतकको संख्या ५ जना रहेको र २४ घण्टाभित्र मृत्यु हुनेको संख्या ४ रहेको छ। मन्त्रालयका अनुसार पछिल्लो २४ घण्टामा काठमाडौंमा १६१, ललितपुरमा २६ र भक्तपुरमा १२ जनामा संक्रमण पुष्टि भएको छ।
