काठमाडौं । काठमाडौंको टुँडिखेलस्थित सैनिक मञ्चमा नेपाली सेनाले घोडेजात्रा कार्यक्रम आयोजना गरेको छ ।
आइतबार राष्ट्रपति विद्यादेवी भण्डारीको प्रमुख आतिथ्यतामा विविध अश्वकलाले भरिपूर्ण रोचक कार्यक्रमहरु सहितको राष्ट्रिय पर्व ‘घोडेजात्रा समारोह २०७७’ सम्पन्न गरिएको हो ।
समारोहमा अश्वकलाका विविध रोचक कार्यक्रमहरु राइड पासर डगद्वारा मार्चपास, टांगन घोडा दौड, डगद्वारा बुकी लोटस, साइकल रेस, शो जम्प, ड्रिल राइड गार्ड डग प्रदर्शन, हर्स बल डग रिले रेस, हंगेरियन पोष्ट लागायतका विविध रोमाञ्चक कलाहरु प्रदर्शन भएको थियो ।
प्रदर्शनी पश्चात राष्ट्रपतिज्यूबाट म्युजिकल राईडमा प्रथम र द्वितीय हुने क्रमशः घोडसवार सह सेनानी प्रवेश खड्का र उप सेनानी दिपिन थापा, शो जम्पमा प्रथम र द्वितीय हुने क्रमशः घोडसवार सिपाही ओमप्रकाश यादव र जगदिश घिसिङ्ग तथा साईकल रेसमा प्रथम र द्वितीय हुने क्रमशस् ओकेशराज बज्राचार्य र हिमाल टमाटालाई पुरस्कार प्रदान गर्नु भएको थियो ।
समारोहको अन्त्यमा प्रधान सेनापति महारथी पूर्णचन्द्र थापाले प्रथम पटक प्रकाशित ‘पहिलो तथा दोस्रो विश्व युद्धमा सहभागी नेपाली सैनिकहरुको विवरण’ शिर्षकको पुस्तक विमोचन गर्नुहुँदै पुस्तक लेखनमा योगदान पुर्याउने लेखकहरु तथा रथीवृन्दलाई कदर(पत्र प्रदान गर्नु भएको थियो ।
नेपाल टेलिभिजनबाट प्रत्यक्ष प्रशारण भएको उक्त समारोहमा उप राष्ट्रपति, प्रधानमन्त्रीलगायत सर्वसाधारणको समेत उपस्थिति रहेको थियो ।
