काठमाडौं । नेपाल पत्रकार महासंघको नयाँ नेतृत्वका लागि आज (बुधबार) चुनाव हुँदै छ । मतदान बिहान ९ बजेदेखि अपराह्न ५ बजेसम्म हुनेछ ।
देशैभर पहिलो पटक प्रतयक्षरुपमा केन्द्र, प्रदेश र जिल्ला समिति चयनका लागि निर्वाचन हुन लागेको हो । नेपाल पत्रकार महासंघको केन्द्रीय निर्वाचन समितिका अनुसार यसपटक निर्वाचनमा १३ हजार १२२ मतदाता सहभागी हुनेछन् ।
यसअघि जिल्लाबाट छानिएर आएका पार्षदले मात्र मतदान गर्न पाउने व्यवस्थालाई संशोधन गर्दै महासंघले यसपटक सबै साधारण सदस्यले जिल्ला, प्रदेश र केन्द्रका सबै पदाधिकारी एवं सदस्यका लागि मतदान गर्न पाउने व्यवस्था गरेको हो । मतदान आफू सदस्य रहेको शाखामै गर्न पाइनेछ ।
महासंघको केन्द्रीय अध्यक्षका लागि ३ जनाको उम्मेदवारी परेको छ । विपुल पोखरेल, निर्मला शर्मा र गजेन्द्रसिंह बुढाथोकीको उम्मेदवारी परेको हो ।
नेपाली कांग्रेस, माओवादी केन्द्र, नेकपा एमाले (माधव नेपाल पक्ष) लगायत दलनिकट पत्रकार संगठनले एउटै प्यानल बनाएका छन्, जसको नेतृत्व प्रेस युनियनका पाखरेलले गरेका छन् । यस्तै एमालेकै सत्ता पक्ष अर्थात् प्रधानमन्त्री केपी शर्मा ओलीनिकट प्रेस चौतारीको छुट्टै प्यानल छ, जसको नेतृत्व शर्माले गरेकी छन् । यस्तै स्वतन्त्रबाट बुढाथोकीको उम्मेदवारी परेको हो ।
प्रदेश संरचनामा १० प्रदेश मानेर निर्वाचन क्षेत्र छुट्याइएको छ । सातवटा प्रदेशबाहेक काठमाडौं, ललितपुर र भक्तपुरमा ‘उपत्यका प्रदेश’ संरचना बनाइएको छ । उपत्यकाका ३ जिल्लाबाहेक बागमती प्रदेशका अन्य जिल्ला समेटेर बागमती प्रदेश बनाइएको छ ।
एसोसिएटलाई पनि प्रदेश स्तरकै मान्यता दिइएको छ । एसोसिएटमा अनलाइन पत्रकार संघ, चलचित्र पत्रकार संघ, खेलकुद पत्रकार संघ र वातावरण पत्रकार समूहको सहभागिता छ । त्यस्तै प्रतिष्ठानहरूबाट बेग्लै प्रदेशस्तरको मतदान हुनेछ ।
