काठमाडौं । बाँकेको नरैनापुर गाउँपालिका वडा नम्बर ४ खोदावामा आगलागी हुँदा १ सय २० भन्दा धेरै घर–गोठ जलेर नष्ट भएका छन् । शनिबार दिउँसो लागेको आगो साँझ मात्र नियन्णमा आएको प्रहरीले जनाएको छ ।

आगो निभाउने क्रममा तीन जना महिला घाइते भएका छन् । उनीहरूको नेपालगन्जमा उपचार भइरहेको छ । खरले छाएका र आपसमा जोडिएका घरगोठ तथा तीव्र हावाहुरीका कारण आगलागीबाट धेरै क्षति भएको प्रहरीले जनाएको छ।

नरैनापुर, नेपालगन्ज उपमहानगरपालिका र नेपाल प्रहरीका पाँचवटा दमकलसहित, नेपाल प्रहरी, सशस्त्र प्रहरी र स्थानीय बासिन्दा मिलेर आगो नियन्त्रणमा लिएका हुन् ।

आगलागीपीडितलाई अहिले राहत वितरण भइरहेको प्रहरी उपरिक्षक ओमबहादुर रानाले जानकारी दिनुभयो । आइतबार जिल्ला विपद् व्यवस्थापन समितिको बैठक बसेर राहतका थप प्याकेज ल्याउने तयारी प्रशासनको छ ।