काठमाडौँ । प्रगतिशील पत्रकार सङ्घले लुम्बिनी, गण्डकी, कर्णाली र काठमाडौँ उपत्यका प्रदेश समितिमा मनोनयन दर्ता गरेको छ ।
आज २०७७ चैत १९ गते देशैभरि पत्रकार महासङ्घको प्रदेशसभा निर्वाचनका लागि प्रगतिशील पत्रकार सङ्घका सदस्यहरूले मनोनयन दर्ता गर्नुभएको हो ।
सङ्घका अध्यक्ष उदय जिएमले दिनुभएको जानकारीअनुसार लुम्बिनी प्रदेशमा खुल्ला उपाध्यक्षमा माधव भाटक्षेत्री, महासचिवमा श्यामलाल पोख्रेल, सचिवमा तिलक गाउँले र खुल्ला सदस्यमा देविराम बन्जाडेले उम्मेदवार दर्ता गराउनुभएको छ ।
यता, गण्डकी प्रदेशमा ताराप्रसाद शर्मा र लोकेन्द्र सुनारले खुल्ला प्रदेश सदस्यमा र पदम (प्रकाश) छन्त्यालले अल्पसङ्ख्यक प्रदेश सदस्यमा मनोनयन दर्ता गराउनुभएको छ ।
त्यसैगरी कर्णाली प्रदेशमा खुल्ला प्रदेश सदस्यमा जीवन शाहीले मनोनयन दर्ता गराउनुभएको छ ।
त्यस्तै, काठमाडौँ उपत्यका प्रदेशमा घनश्याम अधिकारी (बैरागी जेठा) ले खुल्ला प्रदेश सदस्यमा उम्मेदवारी दिनुभएको छ ।
यसअघि प्रगतिशील पत्रकार सङ्घले केन्द्रीय समितिको समावेशी उपाध्यक्षमा उदय जिएम, दलित केन्द्रीय सचिवमा गोपाल बराइली, लुम्बिनी प्रदेशबाट केन्द्रीय सदस्यमा सुमन अधिकारी र खुल्ला (खसआर्य) महिला सदस्यमा भाषा शर्माको मनोनय दर्ता गराइसकेको छ । पछि प्यानलको सहमतिअनुसार गोपाल बराइले दलित केन्द्रीय सचिवको उम्मेदवारी फिर्ता लिनुभएको थियो ।
पत्रकार महासङ्घले आगामी चैत २२ गते जिल्लास्तरमा उम्मेदवारको मनोनयनको मिति निश्चित गरेको छ । जिल्लास्तरमा पनि प्रगतिशील पत्रकार सङ्घका उम्मेदवारहरूले मनोनय दर्ता गर्ने योजना रहेको सङ्गठनले जानकारी दिएको छ ।
पत्रकार महासङ्घको चुनाव प्रत्यक्ष प्रणालीबाट चैत २५ गते सबै जिल्लाहरूबाट एकैपटक हुँदै छ ।
