महोत्तरी । घाँस काट्न गएका बेला बेपत्ता भएका महोत्तरीको भंगाहा नगरपालिका–८, धरमपुराका सात किशोरी र बालिकालाई भारतबाट उद्धार गरी परिवारको जिम्मा लगाइएको छ । ती बालिका र किशोरीको खोजीक्रममा भारतीय प्रहरीले बिहारको सीतामढी रेल्वे स्टेसनमा फेला पारी उद्धार गरेको हो ।
मंगलबार दिउँसो घाँस काट्न भनेर घरबाट निस्किएका ११ वर्षीया अर्चना पासवान, १२ वर्षीया सीमा पासवान र रञ्जना पासवान, १३ वर्षीया ज्योति पासवान र रिया पासवान, १७ वर्षीया नगीना पासवान र २० वर्षीया अस्मिता पासवान सम्पर्कविहीन बनेका थिए ।
भारतीय प्रहरीले फेला पारेका उनीहरुलाई नेपाल प्रहरीले बुधबार राति साढे १० बजे महोत्तरीको सदरमुकाम जलेश्वर ल्याएर परिवारजनको जिम्मा लगाएको हो ।
प्रहरीका अनुसार घटना अनुसन्धानका लागि भंगहा नगरपालिकाका मेयर सञ्जीव साहको रोहबरमा उनीहरूलाई अहिले प्रहरीकै संरक्षणमा राखिएको छ । थप सोधपुछ र अनुसन्धानपछि उनीहरूलाई घर पठाइने छ ।
उनीहरुलाई कसैले प्रलोभन देखाएर भारत लगेको आशंका गरिएको छ । प्रहरीले थप कुरा अनुसन्धन क्रममा खुल्ने बताएको छ ।
सीतामढी प्रहरीसँग भने उनीहरूले गायिका बन्न आफूहरू हिँडेको बयान दिएका छन् । यसबाट पनि उनीहरूलाई कसैले लोभ देखाएर भारत लगेको आशंका गरिएको छ ।
प्रहरीका अनुसार बेपत्ता भएको खबरलगतै बोर्डर सिल गरिए त्यसभन्दा अघि नै उनीहरूले सीमा पार गरिसकेका थिए । सीतामढीमा फेला परेका थाहा पाएपछि महोत्तरीबाट सशस्त्र प्रहरी र नेपाली प्रहरीको टोली बुधबार त्यहाँ पुगेको थियो ।
गाउँबाट एकै पटक ठूलो संख्यामा बालिकाहरु बेपत्ता भएपछि गाउँले त्रसित बनेका थिए । उनीहरुलाई बेचविखनको लागि प्रलोभनमा पारेर सीमा कटाइएको हुनसक्ने प्रहरीले जनाएको छ ।
यो पनि : घाँस काट्न गएका सात बालिका र किशोरी बेपत्ता, अपहरणमा परेको आशंका
