नेपाल कम्युनिष्ट पार्टी (मसाल) ले द्वन्द्वकालमा घटाइएका जघन्य अपराधका घटनामा संलग्नमाथि कारबाही गर्न माग गरेको छ । द्वन्द्वरत पक्षहरुबाट घटाइएका अपराधजन्य घटनाहरुलाई राजनीतिक आडमा र शान्तिसम्झौताको बहानामा छुट दिन नहुनेमा मसालले जोड दिएको छ। सशस्त्र भिडन्तका क्रममा भएका घटनाबारे भने शान्ति सम्झौतापछि कारबाहीको आवश्यकता नपर्ने पनि मसालले स्पष्ट पारेको छ ।
मसालले द्वन्द्वकालिन मुद्दाहरुको सत्यतथ्य छानबिन गरी सुरक्षाकर्मी वा तत्कालिन माओवादी पक्ष जो सुकै भएपनि अपराधका घटनामा संलग्नलाई कारबाही गर्नुपर्ने आवश्यकतामा लगातार जोड दिँदै आएको छ । बिहीबार महामन्त्री मोहनविक्रम सिंहले जारी गर्नुभएको वक्तव्यमा समेत सो विषयलाई महत्वका साथ उठाइएको छ ।
सशस्त्र द्वन्द्वकालमा बर्दियाकी एकजना माओवादी युवतीमाथि सेनाले कुकुरद्वारा समेत बलात्कार गर्न लगाएको घटना सार्वजनिक भएको प्रति गम्भीर ध्यानाकर्षण भएको भन्दै मसालले त्यो अत्यन्त असभ्य, बर्बर र अमानवीय कामको जति निन्दा गरे पनि कम हुने बताएको छ ।
वक्तव्यमा भनिएको छ, ‘हाम्रो पार्टीले शुरुदेखि नै यो कुरामा जोड दिंदै आएको छ कि सशस्त्र द्वन्द्वकालमा सत्तापक्ष वा माओवादी पक्षद्वारा गरिएका सबै अपराधजन्य र अमानवीय कार्यहरूको छानबिन भएर दोषीलाई अपराधअनुसार सजाय हुनुपर्छ । द्वन्द्वकालमा ती दुवै पक्षहरूद्वारा सशस्त्र भिडन्तको क्रममा भएका हिंसात्मक घटनाहरूका लागि शान्ति सम्झौतापछि कुनै कारवाहीको आवश्यकता हुँदैन । तर, शान्ति सम्झौताका नाममा निर्दोष जनतामाथि हुने सबै अमानवीय वा अपराधजन्य कारवाहीहरू स्वतः क्षम्य हुँदैनन् र तिनीहरूबारे आवश्यक छानवीन गरेर वा मुद्दा चलाएर अपराधको प्रकृतिअनुसार दोषीमाथि कारवाही हुनुपर्दछ ।’
त्यस प्रकारका अपराधजन्य कारवाहीहरूलाई कुनै पनि अवस्थामा राजनीतिक मान्न नसकिने र शान्ति सम्झौताका कारणले तिनीहरूलाई मिनाहा दिने कुनै पनि प्रयत्नलाई समर्थन गर्न नहुने पनि मसालको जोड छ ।
यस्तै, मसालले बलात्कृत भएकी पीडित महिलालाई पनि सोही कारणले अपमानित भएर बस्नुपर्ने कुनै कारण नभएको भन्दै आत्मविश्वासका साथ अगाडि बढ्न आग्रह गरेको छ । ति महिला बलात्कृत भएको थाह पाएर पनि विवाह गर्ने पुरुषप्रति पनि मसालले सम्मान प्रकट गरेको छ ।
