दिनेश रैदास, दाङ ।
राष्ट्रिय जनमोर्चाका पार्टी सदस्य दाङका रवी डाँगीको सवारी दुर्घटनामा निधन भएको छ । अर्का सदस्य सिरिन्ज भण्डारी गम्भीर घाइते हुनुभएको छ ।
घोराही उपमहानगरपालिका–५ धर्ना धौलाडाडा निवासी डाँगी र भण्डारी यही चैत ११ गते राति २ बजे सडक दुर्घटनामा पर्नुभएको थियो । लमही–घोराही सडक खण्डमा भएको दुर्घटनाका क्रममा डाँगीको घटनास्थलमै मृत्यु भएको थियो भने भण्डारी गम्भीर घाइते हुनुभएको हो । भण्डारीको कोहलपुरमा उपचार भइरहेको छ ।
मृतक डाँगीको बिहीबार नैनवार आर्यघाटमा सम्मानका साथ दाहसंस्कार गरिएको छ । उहाँको पार्थीव शरीरमा अखिल नेपाल जनजाति सम्मेलनका जिल्ला अध्यक्ष तथा राष्ट्रिय जनमोर्चाका पूर्वजिल्ला सदस्य रामबहादुर जिएमले पार्टीको झन्डा ओढाएर अन्तिम श्रद्धाञ्जली अर्पण गर्नुभएको थियो । त्यस क्रममा आयोजित शोक सभाको सञ्चालन अखिल नेपाल युवक संघका जिल्ला सदस्य तथा घोराही नगर अध्यक्ष डोरबहादुर केसीले गर्नुभएको थियो ।
राष्ट्रिय जनमोर्चा दाङ र अखिल (छैठौं) जिल्ला समिति दाङले मृतक डाँगीप्रति श्रद्धाञ्जली अर्पण गर्दै घाइते भण्डारीको सीघ्र स्वास्थ्यलाभको कामना गरेका छन् । रवी डाँगी जस्तो होनहार युवालाई अकल्पनीय घटनामा गुमाउनु परेकोमा दुवै संगठनद्वारा गहिरो दुःख प्रकट गर्नुका साथै शोक सन्तप्त परिवारप्रति समवेदाना प्रकट गरिएको छ ।
