काठमाडौं । विश्व बैंकले नेपाललाई कोभिड–१९ विरुद्धको खोपका लागि ७ करोड ५० लाख डलर सहायता प्रदान गर्ने भएको छ। बिहीबार विश्व बैंकको कार्यकारी सञ्चालक समितिले सो प्रस्ताव पारित गरेको हो ।
सुरक्षित र प्रभावकारी कोभिड–१९ विरुद्धको खोपमा नेपाली नागरिकको समान र सहज पहुँच सुनिश्चित गर्न इन्टरनेसनल डेभलपमेन्ट एसोसियसन (आईडीए) मार्फत् सो सहायता प्रदान गर्न लागिएको विश्व बैंकले जनाएको छ ।
विश्व बैंक यसअघि पनि गत अप्रिल महिनामा कोभिड–१९ आपत्कालीन पहल तथा स्वास्थ्य प्रणाली तयारी परियोजनाअन्तर्गत २ करोढ ९० लाख डलर सहायता गरेको थियो।
विश्व बैंकले अहिले उपलब्ध गराएको अतिरिक्त वित्तीय सहयोग बैंकले दक्षिण एसियामा कोभिड–१९ भ्याक्सिन अभियानको पहिलो चरणमा गर्न लागेको खोप सहयोग अन्तर्गतका तीन परियोजामध्येको एक हो ।
बिहीबार नै बैंकले बंगलादेशका लागि ५० करोड डलर, अफगानिस्तानका लागि ६ करोड डलर प्रदान गर्ने लगायतका प्रस्तावहरु पनि पारित गरेको छ ।
