काठमाडौं । राष्ट्रिय जनमोर्चा र नेकपाबीच उपनिर्वाचनमा प्रतिनिधसभा र प्रदेशसभामा तालमेल गरेर जाने सहमति भएको छ । बुधबार नेकपाका अध्यक्ष एवं प्रधानमन्त्री केपी शर्मा ओली र राष्ष्ट्रिय जनमोर्चाका अध्यक्ष चित्रबहादुर केसीबीच भएको घेटभाटमा चुनावी तालमेल गर्ने सहमति भएको हो ।
भेटमा प्रधानमन्त्रीका राजनीतिक सल्लाहकार बिष्णु रिमाल, परराष्ट्र सल्लाहकार डा. राजन भट्टराई तथा राजमोका महासचिव जनकराज शर्मा, सचिव हिमलाल पुरी र पूर्व सचिव कृष्ण अधिकारी सहभागी हुनुहुन्थ्यो ।
भेटमा प्रधानमन्त्री ओलीले वामन्थी आन्दोलनलाई बलियो बनाउन वामदलहरुबीच सहकार्यको आवश्यकता औँल्याउनुभयो । नेकपाका अध्यक्षसमेत रहेका ओलीले विगतको निर्वाचनमा जुन दलले जहाँ जितेको थियो, उपनिर्वाचनमा पनि सो स्थानमा अर्को दलले सघाउने गरी तालमेल गर्नुपर्ने बताउनुभएको थियो ।
भेटघाटमा राष्ट्रिय जनमोर्चाका अध्यक्ष केसीले पनि वामपन्थी दलहरुबीचको सहकार्यमा जोड दिँदै देशमा पुनः प्रतिगामी शक्तिहरु सल्बलाउन थालेकोप्रति सचेत रहन आग्रह गर्नुभयो । अध्यक्ष केसीले प्रधानमन्त्री ओलीलाई आफ्नो दलले सरकारलाई दिएको समर्थन अहिले पनि कायम रहेको जानकारी दिँदै तर सरकारले कैयौँ आचरणमा सुधार गर्नुपर्ने सुझाव पनि दिनुभयो ।
आगामी मंसिर १४ गते प्रतिनिधसभा अन्तर्गत कास्की क्षेत्र नं २, प्रदेशसभा अन्तर्गत दाङ ३ (ख), भक्तपुर १ (ख) र बागलुङ २(ख) मा उपनिर्वाचन हुनेछ । ति क्षेत्रहरुमा कास्की २ बाट निर्वाचित नेकपाका सांसद तथा बहालवाला संस्कृति, पर्यटन तथा नागरिक उड्डयनमन्त्री रवीन्द्र अधिकारीको हेलिकोप्टर दुर्घटनामा १५ फागुनमा निधन भएको थियो । भने दाङ ३ (ख) बाट निर्वाचित प्रदेशसभा सदस्य उत्तरकुमार ओलीको कार दुर्घटनामा निधन भएपछि खाली भएको हो । भक्तपुर १ (ख) बाट निर्वाचित हरिशरण लामिछानेको उच्च रक्तचाप बढेपछि उपचारका क्रममा निधन भएको थियो । त्यस्तै, बाग्लुङ २ (ख) बाट गण्डकी प्रदेश सांसद टेकबहादुर घर्तीको जन्डिसका कारण निधन भएको थियो ।
राजमोले मंगलबार मात्रै उपनिर्वाचनमा तालमेलबारे आफ्नो धारणा स्पष्ट पारेको थियो । राजमोले केन्द्र र प्रदेशमा वामपन्थी दलसँग मात्रै तालमेल गर्नेछ भने स्थानीय तहमा कांग्रेससँग पनि तालमेल गर्ने नीति खुला राखेको छ ।
