काठमाडौँ । वैज्ञानिक अनुसन्धानकर्मी जीतेन्द्र ढकाललाई मातृशोक परेको छ ।
उहाँकी ८९ वर्षीया आमा कमला ढकालको २०७७ फागुन २९ गते बिहान ३ः५५ मा निधन भएपछि उहाँलाई मातृशोक परेको हो ।
उहाँको आजै पशुपति आर्यघाटमा दाहसंस्कार गरिएको छ । दाहसंस्कारमा नेकपा (मसाल) का महामन्त्री मोहनविक्रम सिंह, नेकपा (मसाल) बागमती प्रदेशका प्रवक्ता समीर सिंह, राष्ट्रिय जनमोर्चा काठमाडौँका सचिव छवि खनाललगायतको उपस्थिति रहेको थियो ।
राजमो काठमाडौँका नेतासमेत रहनुभएका जीतेन्द्रकी आमा कमला ढकाल लामो समयदेखि नसा र बाथरोगबाट पीडित हुनुहुन्थ्यो ।
जीतेन्द्रका अनुसार १५ दिनअघिदेखि कोखा दुख्ने समस्या देखा परेपछि उहाँलाई धुम्बाराहीस्थित ह्याम्स अस्पतालमा चेकजाच गर्दा फियोमा रगत जाने नलीमा समस्या देखिएको थियो ।
आवश्यक चेकजाँच र औषधिसहित अस्पतालबाट डिस्चार्ज भएर घरमै उपचार भइरहँदा पनि उहाँको स्वास्थ्यमा सुधार नभएको जीतेन्द्र बताउनुहुन्छ ।
स्वास्थ्यमा सुधार नभएपछि दुई पटकसम्म एमआरआई, सिटीस्क्यान गर्दा उहाँको टाउको ब्लिडिङ भएको (म्यासिभ ह्यामरेज) पत्ता लागेको थियो ।
१० दिनअघि बेहोस अवस्थामा घरमै उपचार भइरहेका बेला आज बिहान उहाँकै निवासस्थान बुढानीलकण्ठ–१०, चपली इटालीचोकमा उहाँको निधन भएको हो ।
पिता वेदवराज ढकाल र हाल निधन भएकी कमला ढकालको जीतेन्द्र ढकाल एक्लो छोरा हुनुहुन्छ ।
