काठमाडौं । राष्ट्रिय जनमोर्चाले आगामी मंसिर १४ गते हुने उपनिर्वाचनमा चुनावी तालमेलका लागि नेपाल कम्युनिष्ट पार्टी (नेकपा) लाई प्रस्ताव पठाएको छ । मंगलबार पार्टीका उपाध्यक्ष एवं प्रवक्ता दुर्गा पौडेलले एक वक्तव्य प्रकासित गरी प्रधानमन्त्री एवं नेकपाका अध्यक्ष केपी शर्मा ओलीलाई प्रस्ताव पठाइएको जानकारी दिनुभएको छ ।

यसअघिको संसदीय निर्वाचनमा पनि तत्कालिन नेकपा एमाले र माओवादी केन्द्रको वामगठबन्धन र राष्ट्रिय जनमोर्चाबीच कतिपय जिल्लामा तालमेल भएको थियो । खासगरी बागलुङ र प्युठानमा भएको चुनावी तालमेलबाट नेकपा र राजमोका उम्मेदवारहरु विजय भएका थिए ।

अहिले चुनावी तालमेल भएमा कास्कीको एक प्रतिनिधिसभा बागलुङ र दाङका प्रदेशसभाका कुनै क्षेत्रमा राजमोले उम्मेदवार खडा गर्ने र कुनै क्षेत्रमा नेकपालाई सहयोग गर्ने राजमोले जनाएको छ । उपनिर्वाचन हुने क्षेत्रमध्ये प्रदेशसभा बागलुङ २ (ख) मा राजमोका तर्फबाट विजयी टेकबहादुर घर्तीमगरको निधन भएपछि सो स्थान खाली भएको हो ।यस्तै, राजमोले स्थानीय निर्वाचनमा भने नेपाली कांग्रेससँग पनि चुनावी तालमेल हुनसक्ने स्पष्ट पारेको छ । यदी चुनावी तालमेल हुन नसके निर्वाचन हुने सबै क्षेत्रमा राजमाेले उम्मेद्वारी दिने पनि प्रवक्ता पाैडेलकाे विज्ञप्तिमा उल्लेख छ ।

वक्तव्यमा भनिएको छ,

“आगामी संघ, प्रदेश र स्थानीय तहका उपनिर्वाचनहरु बारे राष्ट्रिय जनमोर्चाले आफ्नो नीति निश्चित गरेको छ । त्यस अनुसार कास्कीको संसदीय निर्वाचन तथा बागलुङ र दाङका प्रदेश निर्वाचनहरुमा नेकपा (नेकपा)सित तालमेल गर्न राष्ट्रिय जनमोर्चाले पहल गरिरहेको छ । त्यसका लागि प्रधानमन्त्री केपी शर्मा ओलीसित वार्ताका लागि हामीले प्रस्ताव पठाएका छौं । उनीहरुसित तालमेल हुन सकेमा परस्परको समझदारी अनुसार हामीले कुनै क्षेत्रमा आफ्नो उम्मेदवार खडा गर्ने र कुनै क्षेत्रमा नेकपाका उम्मेदवारलाई समर्थन गर्ने नीति अपनाउन सक्ने छौं । समझदारी नभएमा उक्त तीनवटै क्षेत्रहरुमा हामीले आफ्ना उम्मेदवारहरु खडा गर्ने छौं । हाम्रो चुनावी तालमेल सम्बन्धी नीतिमा भएको एउटा अन्तर माथि पनि केही प्रकाश हाल्न चाहन्छौं । संघ र प्रदेशको चुनावको हकमा नेकपा (नेकपा)सित तालमेलको नीति खुला हुनेछ र स्थानीय तहमा नेपाली कांग्रेससित पनि तालमेल गर्न सकिनेछ ।”

यी स्थानमा हुनेछ उपनिर्वाचन

प्रतिनिधसभा अन्तर्गत कास्की क्षेत्र नं‍ २ मा उपनिर्वाचन हुनेछ । त्यहाँबाट निर्वाचित नेकपाका सांसद तथा बहालवाला संस्कृति, पर्यटन तथा नागरिक उड्डयनमन्त्री रवीन्द्र अधिकारीको हेलिकोप्टर दुर्घटनामा १५ फागुनमा निधन भएको थियो ।

यस्तै प्रदेश सभामा तीन सिट खाली छ । दाङ ३ (ख) बाट निर्वाचित उत्तरकुमार ओलीको कार दुर्घटनामा निधन भएपछि खाली भएको हो । भक्तपुर १ (ख) बाट निर्वाचित हरिशरण लामिछानेको उच्च रक्तचाप बढेपछि उपचारका क्रममा निधन भएको थियो । त्यस्तै, बाग्लुङ २ (ख) बाट गण्डकी प्रदेश सांसद टेकबहादुर घर्तीको जन्डिसका कारण निधन भएको थियो ।

सुनसरीको धरान उपमहानगरपालिका प्रमुख तारा सुब्बाको निधन भएपछि खाली छ । त्यस्तै, तीनवटा गाउँपालिकाको अध्यक्ष पद रिक्त छ । महोत्तरीको पिपरा गाउँपालिका अध्यक्ष विनोद चौधरी, संखुवासभाको मकालु गाउँपालिका अध्यक्ष खडगबहादुर कटुवाल र पाँचथरको फाल्गुनानन्द गाउँपालिका अध्यक्ष अमरबहादुर नेम्वाङको मृत्यु भएर खाली भएको हो ।

हुम्लाको खार्पुनाथ गाउँपालिकाका उपप्रमुख सिन्धु हमाल शाहीको निधन भएपछि त्यहाँ पनि उपनिर्वाचन हुँदैछ । त्यस्तै, ३६ जिल्लाका ४१ वडाध्यक्ष पद खाली रहेको निर्वाचन आयोगले जनाएको छ ।

अर्घाखाँची मालारानी गाउँपालिका–३, मोरङ धनपालथान गाउँपालिका–२, पाँचथर हिलिहाङ गाउँपालिका–७, सिरहाको कल्याणपुर नगरपालिका–१२, प्युठानको ऐरावती गाउँपालिका १ र २ तथा प्युठान नगरपालिका–२ मा वडाध्यक्ष पद रिक्त छ । महोत्तरीको मटिहानी नगरपालिका–६, बलवा नगरपालिकाका ८ र २, संखुवासभा खाँदबारी नगरपालिकाका ३ र ५, नुवाकोट दुप्चेश्वर गाउँपालिका–१, सल्यान कुमाखमालिका गाउँपालिका–५, डोटीको आदर्श गाउँपालिका–२, बाग्लुङ बडिगाड गाउँपालिका–२, रामेछाप उमाकुण्ड गाउँपालिका–५, दाङको घोराही उपमहानगरपालिका–१६, बाँकेको कोहलपुर नगरपालिका–१६, सुनसरीको धरान उपमहानगरपालिका–७, बाजुरा त्रिवेणी नगरपालिका–१ मा पनि वडाध्यक्ष पद खाली छ ।

त्यस्तै, चितवनको खैरहनी नगरपालिकाका ४ र ५, रौटहटको गढिमाई नगरपालिका–२, अछामको मल्लेख गाउँपालिका–५, पर्साको सखुवा–पर्सौनी गाउँपालिका–५, काभ्रेका धुलिखेल नगरपालिका–२, सर्लाहीको हरिपुर्वा नगरपालिका–१, काठमाडौंको दक्षिणकाली नगरपालिका–३, बाराको बारागढी गाउँपालिका–१, गुल्मीको रुरु गाउँपालिका–६, बैतडीको दोगडाकेदार गाउँपालिका–४, सप्तरीको छिन्नमस्ता गाउँपालिका–७, रुपन्देहीको रोहिणी गाउँपालिका–७, सिन्धुपाल्चोकको इन्द्रावती गाउँपालिका–८, कञ्चनपुरको पुनर्वास नगरपालिका–३, खोटाङको साकेला गाउँपालिका–३, नवलपरासीको बुद्धिकाली गाउँपालिका–५ मा वडाअध्यक्ष खाली भएकाले उपनिर्वाचन गर्नुपर्ने निर्वाचन आयोगले जनाएको छ ।