काठमाडौं । दक्षिणी सुडानमा शान्ति स्थापनार्थ कार्यरत सशस्त्र प्रहरी बल, नेपालको युनिट सर्वोत्कृट भएको छ ।
संयुक्त राष्ट्र सङ्घको आह्वानमा शान्ति स्थापनार्थ दक्षिणी सुडानको जुवामा तैनाथ सशस्त्र प्रहरी बल, नेपालको फम्र्ड पुलिस युनिट (एफपियू–१० सर्वोकृष्ट भएको एपिएफले जनाएको छ ।
अनमिस पुलिस कमिसनर युनेसी लुतु भुनिवाकाद्वारा एलिन पिकेरिङको नेतृत्वमा गठित चार सदस्यीय कार्यसम्पादन परीक्षण तथा मूल्याङन समितिले दक्षिणी सुडानमा तैनाथ ६ वटा एफपियूहरूमध्ये राजधानी जुवामा तैनाथ नेपाल एफपियू–१ लाई सर्वोकृष्ट युनिट घोषणा गरेको हो ।
उक्त समितिले तयार पारेको कार्यसम्पादन परीक्षण तथा मूल्याङ्कन प्रतिवेदनमा नेपाल एफपियूले शत्–प्रतिशत नतिजा प्राप्त गरी हालसम्मकै
सर्वोकृष्ट हुन सफल भएको उक्त युनिटका कमान्डिङ अफिसर सशस्त्र प्रहरी बरिष्ठ उपरीक्षक कुमार न्यौपानेले जानकारी दिए ।
कुनै पनि मिसनमा तैनाथ एफपियूहरुबिच विभिन्न बिधामा मूल्याङ्कन गरी उत्कृष्टता छनौट गर्ने कडीको रूपमा लिइने यस मूल्याङ्कनलाई एफपियूहरूले प्राप्त गर्ने प्राप्ताङ्कका आधारमा उत्कृष्ट छनौट गरिने गरिएको छ । आन्तरिक प्रतिस्पर्धामा समावेश गरिएका आठ बिधाहरू क्रमशः–मिशन कार्यादेशको ज्ञान र समर्थन, कमान्ड एण्ड कन्ट्रोल, नागरिक सुरक्षा, अप्रेशनल रेडिनेस र क्षमता, बन्दोबस्ती क्षमता, प्रशासन, तालिम र स्वास्थ्य तथा कल्याणकारी हुन् । प्रत्येक बिधामा अधिकतम चारचार अङ्कका दरले ३२ पूर्णाङ्क छुट्याईएको थियो । १८ फेब्रुअरी २०२१ मा लिइएको उक्त परीक्षण तथा मूल्याङ्कनमा नेपाल एफपियू–१ ले ३२ अङ्क नै ल्याउन सफल भएको हो ।
सशस्त्र प्रहरी बरिष्ठ उपरीक्षक कुमार न्यौपानेले नेतृत्व गरिरहेको उक्त डप्फामा डेपुटी कमाण्डिङ अफिसर सशस्त्र प्रहरी नायब उपरीक्षक शिवप्रसाद गैरे, चिफ लजिष्टिक अफिसर सशस्त्र प्रहरी नायब उपरीक्षक रामजङ्ग पाण्डे र चिफ अप्रेसन अफिसरको जिम्मेवारीमा सशस्त्र प्रहरी नायब उपरीक्षक अरुणकुमार शर्मा रहेका छन् ।
उक्त एफपियूमा ३४ जना महिला सशस्त्र प्रहरी कर्मचारीसहित १८० सशस्त्र प्रहरी अधिकृत तथा जवान कार्यरत छन् ।
हाल दक्षिण सुडानमा रहेका एफपियूहरूमा नेपालको तर्फबाट दुई वटा, रुवन्डाको तीन वटा र घानाको एक गरी जम्मा ६ वटा एफपियूहरू कार्यरत रहेका छन् । शान्ति प्रक्रियामा रहेको यस राष्ट्रमा २०२३ डिसेम्बरमा आम निर्वाचन हुन गइरहेको छ । यसै क्रममा एफपियूहरूको सङ्ख्यामा कटौती गरी इन्डिभिजियल प्रहरीहरूको सङ्ख्या वृद्धि गर्ने योजनाको साथ अगाडि बढिरहेको परिप्रेक्ष्यमा यस रिपोर्टलाई अर्थपूर्ण रूपमा हेरिएको छ ।
