काठमाडौं । सप्तरी प्रहरीले ५६ वर्षअघिको मुद्दामा एक वृद्धलाई पक्राउ गरी जेल पठाएको छ । ७० वर्षीय वृद्ध ५६ वर्ष पहिलेको मुद्दामा आइतबार जेल चलान भएका हुन् ।

जिल्ला अदालत सप्तरीले आइतबार ७० वर्षीय श्रीलाल यादवलाई डाँका र जालसाजी मुद्दामा कारागार चलान गरेको हो । उनीविरुद्ध जिल्ला अदालतले २०२३ साल भदौ ३ गते डाँका मुद्दामा १० वर्ष र २०२१ साल जेठ १९ गते जालसाजी मुद्दामा ६ महिना कैदको फैसला गरेको थियो ।

सुरैतलाल यादवले उनीविरुद्ध डाँका र जालसाजी मुद्दा दायर गरेका थिए ।श्रीलाल यादवलाई ५६ वर्षपछि प्रहरीले गत शुक्रबार पक्राउ गरेको थियो ।

उनलाई प्रहरीले सोही दिन अदालतमा पेश गरेको थियो । आइतबार अदालतले कैद भुक्तानको लागि कारागार पठाएको हो ।