दिनेश रैदास, दाङ ।
दाङको राजपुर गाउँपालिका वडा नं ७ हाडबास र लमही नगरपालिका वडा नं अमेलिया जोड्ने राप्ती नदीमा झोलुंगेपुल निर्माणका लागि योजना माग पत्र पेश गरिएको छ ।
राजपुर गाउँपालिका वार्ड नं ७ हाडबास टोल विकासका अध्यक्ष एवम् राष्ट्रिय जनमोर्चा राजपुर वार्ड नं ७ का सचिव टेकबहादुर डाँगीको नेतृत्वमा गएको एक टोलीले ललितपुर स्थित सस्पेन्सन् ब्राइज विभागमा झोलुंगेपुल योजना माग निवेदन दर्ता गरेको छ । उक्त निवेदनमा राजपुर गाउँपालिका र लमही नगरपालिकाको सिफारिस तथा राजपुर गाउँपालिकाको प्राविधिक प्रेफिविलिटिज नाप प्रतिवेदन समेत संलग्न गरिएको छ ।
हाडबास अमेलिया जोड्ने राप्ती नदीमा पुल नहुँदा हाडबास लगायत राजपुर गाउँपालिका वार्ड नं ७ का स्थानीय तथा मित्र राष्ट्र भारतबाट वर्षेनी स्वर्गद्वारी तथा बगारबाबा धार्मिक पर्यटकीय क्षेत्र रिहारमा दर्शन गर्न आउने हजारौं तीर्थयात्रीलाई असुविधा हुने गरेको छ । साथै त्यस क्षेत्रका बालबालिकाहरूलाई अमेलिया, रिहार, सतबारिय, लमही लगायतका अन्य ठाउँहरूमा अध्ययन गर्न राप्ती नदीमा डुंगाबाट जोखिमपूर्ण यात्रा गर्नुपर्ने बाध्यता रहेको स्थानीयले बताएका छन् ।
सो पुल अगामी आर्थिक वर्ष ७८/७९ को वार्षिक बजेटमा पारिदिन संघीय संसद र प्रदेश सभामा प्रतिनिधित्व गर्ने सांसदहरुसँग समेत आग्रह गर्ने योजना रहेको टोल विकास समितिका अध्यक्ष टेकबहादुर डाँगीले जानकारी दिनुभयो । झोलुंगेपुल योजना माग गर्न गएको टोलीमा राजमो दाङ जिल्लाका उपाध्यक्ष तथा सञ्चारकर्मी महेश रिजाल पनि सहभागी हुनुहुन्थ्यो ।
