काठमाडौँ । प्रगतिशील पत्रकार सङ्घलगायतका चार पत्रकार सङ्गठनहरूले आसन्न पत्रकार महासङ्घको निर्वाचनमा सहमतीय प्रणालीबाट अघि बढ्न आग्रह गरेका छन् ।
आज २०७७ फागुन १६ गते जारी संयुक्त प्रेसविज्ञप्तिमार्फत यस्तो आग्रह गरिएको हो ।
प्रगतिशील पत्रकार सङ्घ नेपालका अध्यक्ष उदय जिएम, क्रान्तिकारी पत्रकार महासङ्घका का.वा. अध्यक्ष नारायण पङ्गेनी, जनपत्रकार सङ्गठन नेपालका संयोजक शेरबहादुर विक र प्रेस नेपालका अध्यक्ष केशव अर्यालको हस्ताक्षरमा जारी प्रेसविज्ञप्तिको पूर्ण पाठ यस्तो छ–
“हामी तपशिलका विषयहरूमा निम्नलिखित सङ्गठनहरू नेपाल पत्रकार महासङ्घको आसन्न निर्वाचनमा सहकार्य गर्न सहमत भएका छौँ ।
१. श्रमजीवी पत्रकारहरूको हकहितको पक्षमा विगतदेखि आन्दोलनरत रहँदै आएका हामी पत्रकार सङ्गठनहरूबिचको विगतको सहकार्यलाई आसन्न निर्वाचनको क्रममा निरन्तरता दिन प्रतिबद्ध छौँ ।२. नेपाल पत्रकार महासङ्घको सबै तहका संरचनाहरूमा वैचारिकलगायत विभिन्न जाति, भाषा, क्षेत्र र लैङ्गिक रूपमा साझा र समावेशी हुने गरी सबै क्रियाशील ससङ्घ–सङ्गठनको प्रतिनिधित्वको सुनिश्चितताका लागि सम्बन्धित सबै पक्षसित अपिल गर्दछौँ ।
३. पत्रकारहरूको पेसागत एवम् भौतिक सुरक्षाका लागि सम्बन्धित निकायलाई पहल गर्न र खबरदारी गर्न आह्वान गर्दछौँ ।
४. प्रेस तथा अभिव्यक्ति स्वतन्त्रताको ग्यारेन्टीका लागि सम्बन्धित निकायमा दबाब सृजना गर्दै प्रेस स्वतन्त्रता विरोधी कानुनहरूको खारेजीको माग गर्दछौँ ।
५. नेपाल पत्रकार महासङ्घको निर्वाचनलाई सहमतीय प्रणालीबाट सम्पन्न गर्न सरोकारवाला सबै पक्षसित अपिल गर्दछौँ ।”
