काठमाडौं । यौन दुराचारको आरोपमा प्रहरी हिरासतमा रहेका निवर्तमान सभामुख कृष्णबहादुर महराले सांसद पदबाट राजीनामा नदिने बताएका छन् ।
संसद सचिवालयकी एक महिला कर्मचारीमाथि बलात्कार प्रयास गरेको आरोप लागेपछि नेकपाले उनलाई सभामुखसहित सांसदबाट राजीनामा दिन भनेको थियो । तर, महराले सभामुख पदबाट तत्काल राजीनामा दिएपनि सिांसद पदबाट राजीनामा दिएका थिएनन् । आफू नेकपामा नरहेको भन्दै दलको निर्देशन नमान्ने महराले बताएका छन् ।
आफूले सभामुख निर्वाचनसँगै पार्टीको साधारण सदस्यसमेत त्याग गरेको बताउँदै उनले आफू नेकपामा नभएकाले राजीनामा नदिने बताएका हुन् । उनले आफू नेकपाको नेता नै नभएको भन्दै सो पार्टीको सुझाव किन मान्ने भनेर राजीनामा नदिएको उनीनिकट नेता बताउँछन् ।
उनले राजीनामा नदिँदा उनी संसद्मा स्वतन्त्र सांसदका रूपमा रहन सक्छन् । यदी महरा अदालतबाट दोषी ठहर भएमा उनको सांसद पद जान्छ, अन्यथा उनी सांसद यथावत् रहनेछन् ।
