काठमाडौं । दार्चुलामा गएको सुख्खा पहिरोले महाकाली नदी थुनिएको छ । दार्चुलाको माल्पा भन्ने स्थानमा सडक निर्माणका क्रममा खसेको पहिरोले महाकाली नदी थुनिएको हो ।
नदी थुनिएर ताल बनेका कारण कुनै पनि बेला फुट्न सक्ने भन्दैजिल्ला प्रशासन कार्यालय कञ्चनपुरले सचेत गराएको छ ।
मंगलबार कञ्चनपुर प्रशासनले सूचना प्रकाशित गरी सम्बन्धित क्षेत्रका बासिन्दालाई सचेत हुन आग्रह गरेको हो ।
दार्चुला हुँदै बग्ने महाकाली नदी बैतडी, डडेल्धुरापछि कञ्चनपुरमा आउँदा समथर क्षेत्रमा बग्ने गर्दछ । महाकालीमा बनेको ताल एकैचोटी फुटेमा ठूलो नोक्सानी गर्ने सम्भावना रहन्छ ।
जिल्ला प्रशासनको सूचनामा भनिएको छ, ‘दार्चुलाको माल्पा भन्ने ठाउँमा ठूलो पहिरोको कारण महाकाली नदी थुनिन गएकोले कुनैपनि बेला नदीमा जम्मा भएको पानी फुट्न सक्ने सम्भावना रहेको भन्ने जानकारी हुन आएकोले महाकाली नदी नजिक वस्ती भएका र सो क्षेत्रमा काम गर्ने सबैलाई सचेत रही आवश्यक सतर्कता अपनाउन सम्बन्धित सबैको जानकारीको लागि यो सूचना प्रकाशित गरिएको ब्यहोरा अनुरोध छ।’
