हेटौँडा । मकवानपुरको मनहरी गाउँपालिकाका उपाध्यक्ष मनिला विष्टले आफ्नो पदबाट राजीनामा दिनु भएको छ । अध्यक्षको क्रियाकलापलगायत कुरामा असन्तुष्टि जनाउँदै उपाध्यक्ष विष्टले पदबाट राजीनामा दिनुभएको बताइएको छ ।
गत मङ्सिर २९ गते प्राप्त राजीनामा स्वीकृत समेत गरिएको गाउँपालिकाका अध्यक्ष एकराज उप्रेतीले जानकारी दिनुभयो । पुस १७ गते राजीनामा स्विकृत गरिएको अध्यक्ष उप्रेतीको भनाई छ ।
राजीनामा पत्रलाई सकेसम्म खोल्न नपरोस्, मिलोस भन्ने वातावरणमा बसेपनि कतिपय वडाअध्यक्षहरुको दबाबमा आफूले राजीनामा स्वीकृत गरेको अध्यक्ष उप्रेतीले बताउनुभयो ।
नेपालको संविधान २०७२ को भाग १७ स्थानीय कार्यपालिकाअन्तर्गत धारा २१५ को उपधारा ८ (क) मा अध्यक्षले उपाध्यक्ष समक्ष र उपाध्यक्षले अध्यक्ष समक्ष राजीनामा दिएमा, (ख) मा निजको पदावधि समाप्त भएमा र (ग) मा निजको मृत्यु भएमा पद रिक्त रहने व्यवस्था गरिएको छ ।
