वासिङटन । संयुक्त राज्य अमेरिकामा बुधबार एकै दिन तीन हजार ९०० भन्दा बढी व्यक्तिको कोरोना सङ्क्रमणबाट मृत्यु भएको छ ।
अमेरिकी जोन्स हप्किन्स विश्वविद्यालयका अनुसार पछिल्ला दिनमा एकै दिन यति ठुलो सङ्ख्यामा कोरोना सङ्क्रमितको मृत्यु भएको यो पहिलो घटना हो ।
विश्वमै सबैभन्दा बढी प्रभावित अमेरिकामा विगत २४ घण्टाको अवधिमा तीन हजार ९२७ जनाको ज्यान गएको विश्वविद्यालयले जनाएको छ ।
यस्तै, एकै दिन एक लाख ८९ हजार ६७१ जना नयाँ सङ्क्रमित थपिएका छन् । यससँगै अमेरिकामा कुल सङ्क्रमितको सङ्ख्या २ करोड नाघेको छ भने तीन लाख ५० हजार ७७८ जनाको मृत्यु भएको छ ।
अमेरिकाका एक जना अग्रणी सङ्क्रामक रोगविज्ञ एन्थोनी फाउचीले महामारीको असर हिउँदका दिनमा अझ बढ्न सक्ने चेतावनी दिएका छन् । उनले बिदाका दिनमा हुने जमघटले समेत कोरोना सङ्क्रमण फैलाउन थप भूमिका खेल्ने बताए ।
अमेरिकामा यति बेला खोप लगाउने अभियान जारी छ । करिब २८ लाख व्यक्तिले खोप लगाइसकेका छन् । यसै डिसेम्बर महिनाको अन्त्यसम्ममा २ करोड व्यक्तिलाई खोप दिने राष्ट्रपति डोनाल्ड ट्रम्पको योजना असफल भइसकेको छ । (रासस/एएफपी)
