काठमाडौं । नेपालमा आजसम्म १९ लाख २६ हजार ४७७ जनाको पीसीआर परीक्षण गरिएको छ । स्वास्थ्य तथा जनसंख्या मन्त्रालयले बुधबार आयोजना गरेको प्रेस ब्रिफ्रिङका क्रममा मन्त्रालयका प्रवक्ता प्राडा जागेश्वर गौतमले आजसम्म सो संख्यामा परीक्षण गरिएको जानकारी दिनुभयो । आज ५ हजार ११० जनाको पीसीआर परीक्षण गरिएको उहाँले बताउनुभयो ।
डा. गौतमका अनुसार गएको २४ घण्टामा ५११ जनामा संक्रमण पुष्टि भएको छ । यस्तै, आज ६०० जना डिस्चार्ज भएका छन् । आज काठमाडौंमा २२५, ललितपुरमा ४९ र भक्तपुरमा ३८ जना गरी जम्मा ३२१ जनामा संक्रमण पुष्टि भएको छ ।
प्रवक्ता डा. गौतमका अनुसार गत आइतबारदेखि आजसम्म दुई हजार ३५९ जनामा संक्रमण पुष्टि भएको छ भने दुई हजार ७८० जना संक्रमणमुक्त भएका छन् । यही अवधिमा कोरोना भाइरसबाट २८ जनाको निधन भएको छ । डा. गौतमले आज देशभर ६ हजार ३०० जना सक्रीय संक्रमण रहेका जानकारी दिनुभयो ।
