काठमाडौं । चिनियाँ राष्ट्रपति सी चिनफिङको सन्देश लिएर आइतबार नेपाल आएको उच्चस्तरीय चिनियाँ प्रतिनिधिमण्डल नेपाली नेताहरुसँग भेटघाटमा ब्यस्त रहेको छ । संसद विघटन र सत्तारुढ नेपाल कम्युष्टि पार्टी (नेकपा) को विभाजन पछि बदलिएको राजनीतिक परिस्थितमा चिनियाँ टोली नेपाल आएको हो ।

नेपाल भ्रमणमा रहेका चिनियाँ कम्युनिस्ट पार्टीको अन्तर्राष्ट्रिय विभागका उपमन्त्री गुओ येचौले राष्ट्रपति विद्यादेवी भण्डारी, प्रधानमन्त्री केपी शर्मा ओली, नेकपा (प्रचण्ड–नेपाल) समूहका अध्यक्ष पुष्पकमल दाहालसँग भेटघाट गरेको छ भने अर्का अध्यक्ष माधवकुमार नेपाल र नेता झलनाथ खनाललगायत नेताहरुसँग भेटवार्ता गर्ने कार्यक्रम रहेको जनाइएको छ ।

येचौ नेतृत्वको प्रतिनिधिमण्डलले सोमबार बिहान प्रचण्डसँग भेटवार्ता गरी संसद विघटन, नेकपा विभाजनलगायत विषयमा छलफल गरेको खुमलटार स्रोतले जनाएको छ । यसअघि आइतबार चिनियाँ टोलीले राष्ट्रपति विद्यादेवी भण्डारी र प्रधानमन्त्री केपी ओलीसँग भेटवार्ता गरेको थियो । आइतबार काठमाडौं आइपुगेको चिनियाँ टोली साँझ राष्ट्रपति विद्यादेवी भण्डारीसँग भेटवार्ता गरेपछि प्रधानमन्त्रीलाई भेट्न राती अबेर बालुवाटार पुगेको हो ।

चिनियाँ टोलीले आइतबार साँझ बालुवाटारमा प्रधानमन्त्री ओलीसँग शिष्टाचार भेट गरेको थियो । प्रधानमन्त्री ओलीले प्रतिनिधि सभा विघटन गरेपछि नेकपामा आएको विभाजन बारे अध्ययन गर्न आएको चिनियाँ कम्युनिष्ट पार्टीको टोलीसँग ओलीले करिब दुई घण्टा भेटवार्ता गरेका थिए ।

प्रधानमन्त्रीका परराष्ट्र सल्लाहकार राजन भट्टराईका अनुसार चिनियाँ कम्युनिष्ट पार्टी अन्तर्राष्ट्रिय विभागका उपमन्त्रीले प्रधानमन्त्रीसँगको भेटमा राष्ट्रपति सी चिनफिङले पठाउनु भएको नयाँ वर्ष २०२१ को शुभकामना सन्देश सुनाएका थिए भने नेपाल–चीन सम्बन्ध तथा नेकपा र चिनियाँ कम्युनिष्ट पार्टीबीचको सम्बन्धबारे विचार राखेका थिए ।

चिनियाँ पक्षले आपसी हित र सम्मानमा आधारित दुई देश र दुई पार्टीबीचको सम्बन्धबारे खुशी व्यक्त गरेको भट्टराईले बताउनुभयो । प्रधानमन्त्री ओलीले एक असल छिमेकी देशको नाताले चीनले नेपालको आर्थिक विकासको क्षेत्रमा सहयोग गरेको र भविष्यमा पनि यो सहयोग रहने विश्वास व्यक्त गर्नुभएको थियो ।

आइतबार साढे १ बजे चीनको चेङ्दुबाट काठमाडौं उत्रेको चार सदस्यीय चिनियाँ टोली विमानस्थलबाट सिधै बालुवाटारस्थित चिनियाँ दूतावास पुगेको थियो । कोरोना महामारीबाट जोगिन पीपीई लगाएरै काठमाडौं उत्रेको टोली चार दिन नेपालमा रहँदा दूतवासभित्रै बस्ने जनाइएको ।

भारतमा यस्तो तरंग
चिनियाँ कम्युनिस्ट पार्टीको टोली नेपाल आएपछि भारतमा तरंग पैदा भएको छ । चिनियाँ प्रतिनिधिमण्डलले नेपालका शीर्ष नेतृत्व तहसँग भेटवार्ता गर्न थालेपछि भारत संशकित भएको हो । यस विषयमा भारत सरकारले प्रत्यक्ष केही भनिसकेको नभए पनि यतिबेला भारतीय सञ्चारमाध्यमले विभिन्न शंका व्यक्त गर्दै विश्लेषण गरिरहेका हुन् ।

द हिन्दु अखबारका अनुसार गत हप्ता प्रधानमन्त्री केपी शर्मा ओलीसँग काठमाडौंमा भेट गरेपछि दिल्ली उडेका भारतका राजदूत विनय क्वात्रा भारतीय प्रधानमन्त्री मोदीलाई ओलीको सन्देश पुर्‍याउन आएको अनुमान गरिएको छ । सन्देशमा ओलीले आफूले संसद् भंग गराउनुको कारण बताएको पत्रिकाले दाबी गरेको छ ।

यस्तै, बीबीसी हिन्दीले लेखेको छ, ‘भारतलाई क्षेत्रीय प्रभुत्वको आरोप लगाउने प्रधानमन्त्री ओलीले भारतप्रतिको धारणा नरम बनाइसकेका थिए र यस वर्ष ९सन् २०२०० को अन्त्यतिर शीर्षस्तरको भेटवार्ता सुरु गरेका थिए। तर अहिले तस्बिर केही बदलिएको छ ।’

केवल ७ महिनायता नेपालका शीर्ष नेताको भारतप्रतिको धारणा पूरै परिवर्तन भएको आरोप लगाइएको छ।

उसले अगाडि लेखेको छ, ‘ओलीका विपक्षी र नेकपाकै अध्यक्ष प्रचण्ड, जो कुनै बेला भारतकै समर्थक थिए, अहिले नेपालको राजनीतिनक संकटमा चीनको भूमिकाप्रति मौन बसेका छन् ।’

बीबीसी हिन्दी अगाडि लेख्छ, ‘अर्कातर्फ अन्य देशको आन्तरिक राजनीतिमा टाढै रहने बताउने गरेको चीनले अहिले नेपालको राजनीतिमा हातै हालेको छ। तर हिमालय क्षेत्रमा अस्थिरता पैदा गराएको आरोप लागेको भारत भने नेपालको आन्तरिक मामिलालाई टाढाबाट हेरिमात्र रहेको छ ।’