काठमाडौं । संखुवासभामा प्रहरी टोली र नेकपा विप्लव समूहबीच गोली हानाहान भएको छ । आइतबार दिउँसो चैनपुर–४, मैदानेस्थित जंगलमा गस्तीमा रहेको प्रहरी र विप्लव कार्यकर्ताबीच दोहोरो फाइरिङ भएको प्रहरीले जनाएको छ ।

प्रहरीले सर्च अप्रेसन सुरु गरेपछि विप्लव समूहका कार्यकर्ताले गोली चलाएको र प्रहरीले पनि जवाफी फायर गरेको प्रदेश नं १ का प्रहरी प्रमुख डीआईजी इश्वरबाबु कार्कीले बताउनुभयो ।

सो घटनामा कोही पनि घाइते भएका छैनन् भने प्रहरीले कसैलाई पनि पक्राउ गर्न सफल भएको छैन । तर केही हतियार तथा विस्फोटक सामग्री बरामद भएको प्रहरीको दाबी छ ।

मोरङको मिक्लाजुङमा विप्लव समूहले शिक्षकको हत्या गरेपछि प्रहरीले पूर्वमा विप्लव समूहको खोजी कार्य जारी राखेको छ ।