काठमाडौँ । अखिल नेपाल टे्रड युनियन महासङ्घ (अन्टुक) ले प्रतिनिधि सभा विघटन विरुद्ध सङ्घर्ष गर्ने घोषणा गरेको छ । अन्टुकका का.वा. अध्यक्ष लोकराज भुसालको हस्ताक्षरमा शनिवार जारी प्रेसवक्तव्यमा सो घोषणा गरिएको हो ।
प्रधानमन्त्री केपी शर्मा ओलीको अलोकतान्त्रिक सिफारिस तथा राष्ट्रपतिसमेतको असंवैधानिक कार्यशैलीको विरोध गरिएको प्रेसवक्तव्यको पूर्ण पाठ यस्तो छ
“नेपालको राजनैतिक इतिहासमा पुनः अस्थिरता अराजकता सिर्जना गराउने गरी प्रधानमन्त्री खड्कप्रसाद ओलीले आफ्नो पार्टी जीवनको आन्तरिक शक्ति सङ्घर्षको समुचित व्यवस्थापन लोकतान्त्रिक विधि, प्रकृया र प्रचलित राजनैतिक मूल्यमान्यतानुसार गर्नुको सट्टा नेपाली जनताले निकै लामो र उच्च प्रकारको सङ्घर्ष गरेर स्थापना गरेको लोकतान्त्रिक गणतन्त्रात्मक शासन व्यस्थाखो संस्थागत विकासमा नै धक्का पुर्याउने गरी नेपालको व्यवस्थापिकाको मूल अङ्ग प्रतिनिधि सभाको आकस्मिक रूपमा विघटन गरेर निरङ्कुश र असंवैधानिक कार्य गरेका छन् । यस प्रकारको अलोकतान्त्रिक घटनाप्रति अखिल नेपाल ट्रेड युनियन महासङ्घ (अन्टुक) को गम्भीर ध्यानाकर्षण भएको छ ।
लोकतान्त्रिक विधि, मूल्यमान्यता र संविधानको मूल भावना विपरीत गरिएको उक्त कार्यमा प्रधानमन्त्री ओलीको स्वेच्छाचारी निरङ्कुस चरम व्यक्तिवादी एवम् आत्मकेन्द्रित चरित्रको उदाङ्गो भएको छ । संसारभरका मानवजाति कोरोना महामारीले महासङ्कट खेपिरहेको र नेपालमा पनि उक्त महामारीको असरबाट लाखौँ जनता सङ्क्रमित भएको, हजारौँ अस्पतालको सैयामा छट्पटाइरहेको, स्वास्थोपचारो उचित व्यवस्थापन हुन नसकिरहेको सङ्कटपूर्ण अवस्था, लामो समयको लकडाउन र असहज परिस्थितिबाट उत्पादन क्षेत्र, पर्यटन, होटल, यातायातलगायतका रोजगारीका क्षेत्र धरासायी अवस्थाबाट गुज्रिन बाध्य भएको र त्यसबाट लाखौँ श्रमिक तथा कृषि–मजदुरले रोजगारी गुमाउन बाध्य भई हातमुख जोड्नसमेत निकै असहज परिस्थितिको सामना गरिरहेको अवस्थामा यस प्रकारको अस्थिर राजनैतिक परिस्थिति सिर्जना गराउनुलाई कुनै पनि दृष्टिकोणबाट राम्रो मान्न सकिँदैन ।
प्रतिनिधि सभा विघटनजस्तो गम्भीर राजनैतिक महत्त्वको सिफारिसलाई सम्माननीय राष्ट्रपतिले पनि संवैधानिक मर्मबमोजिम छ वा छैन भनी संवैधानिक कानुनका विज्ञ र राजनैतिक तहमा उच्च प्रकारको विमर्श गरी संविधानको संरक्षकको प्रमुख दायित्व र जिम्मेवारी परिपक्क रूपमा वहन गर्न नसकेको देखियो । यस प्रकारको अवस्थामा भविष्यमा मुलुक अझ जटिलतातिर धकेलिन सक्ने सम्भावना देखिएकाले लोकतान्त्रिक गणतन्त्रको रक्षा गर्दै सम्भावित सबै प्रकारका प्रतिगामी कदम विरुद्धको सङ्घर्षमा एकताबद्ध भएर उत्रिन सम्पूर्ण मजदुर, किसान र आम जनताप्रति हार्दिक अपिल गर्दै नेपाली जनताको मौलिक एवम् लोकतान्त्रिक हक–अधिकार, विधिको शासन, राष्ट्र, राष्ट्रियता, धर्म निरपेक्षताको रक्षा र सङ्घीताको खारेजीका लागि दृढतासाथ सङ्घर्ष गरिराख्ने प्रतिबध्दता ब्यक्त गर्दछौँ ।”
