श्यामलाल पोखरेल/बुटवल ।
राष्ट्रिय जनमोर्चाका अध्यक्ष चित्रबहादुर केसीले सजिलै नयाँ जनवादी क्रान्ति नहुने बताउँदै त्यसका लागि माओले प्रतिपादन गरेका सिद्धान्त व्यवहारमा लागु गर्नुपर्ने बताउनु्भएको छ । त्यस क्रममा उहाँले चीनमा माओले चलाएको लामो अभियानको शिक्षा नेपालको कम्युनिस्ट आन्दोलनमा आत्मसात गर्नुपर्ने बताउनुभएको छ ।

रुपन्देहीको बुटवलमा नेपाल कम्युनिस्ट पार्टी (मसाल) ले आयोजना गरेको १२८औँ माओजयन्ती कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।

कम्युनिस्टको नीति, सिद्वान्त, अनुशासन, आचरण नमान्ने र कम्युनिस्टको नाममा बेथिति गर्ने नक्कली कम्युनिस्टबाट सचेत भएर जनवादी क्रान्तिको बाटोमा लाग्नु पर्ने उहाँको भनाइ थियो । कम्युनिस्ट पार्टीमा अध्ययन गर्ने बानी हराएको उल्लेख गर्दै आवश्यकताले कम्युनिस्ट जन्माएकाले नेपालमा कम्युनिस्टको भूमिका बढेको दावी गर्नुभयो ।

नेता केसीले संसद विघटनमा ओलीको मात्र चाहना नभई अमेरिका, भारत र युरोपिएन युनियनहरूको चाहनाले काम गरेको दावी गर्नुभयो ।

वामपन्थी नेता कृष्णराज पौडेलले माओप्रति श्रद्धासुमन प्रकट गर्दै चीनमा माओले चलाएको सर्वहारा सांस्कृतिक क्रान्तिलाई नेपालको कम्युनिस्ट आन्दोलनमा प्रयोगमा ल्याउनुपर्ने बताउनुभयो । चीनमा भएको प्रतिक्रान्तिले संसारको कम्युनिस्ट आन्दोलनमा असर परेको उल्लेख गर्दै त्यसबाट पाठ सिकेर जनवादी क्रान्तिबाटो उत्तम हो भन्नुभयो ।

कम्युनिस्टको नाममा बनेको दुईतिहाइनजिकको ओली नेतृत्व सरकारले असफल भएको उल्लेख गर्दै दुईतिहाइ पाएको बेला पनि सरकार चलाउन नसकेर संसद विघटन गर्ने ओलीको कदम प्रतिगामी हो भन्नुभयो । संसदीय प्रणाली संसारमै असफ सिद्व भइसकेकाले अबको बाटो जनवादी क्रान्तिको हो भन्नुभयो वामपन्थी नेता कृष्णराज पौडेलले ।

वामपन्थी नेता सुरेश थापाले माओले प्रतिपादन गरेका सिद्वान्त प्रयोगमा नआएकाले नेपालको कम्युनिस्ट आन्दोलनमा विचलन र भड्काव आएको बताउनुभयो । नेपालमा कम्युनिस्ट पार्टीको लक्ष्यानुसार कम्युनिस्ट व्यवस्था स्थापनाका लागि माओ विचारलाई व्यवहारमा आत्मसात गरेर जनवादी क्रान्तिको दिशामा अगाडि बढ्नुको अर्को विकल्प छैन भन्नुभयो । ठोस परिस्थितिको ठोस संश्लेष्ण नहुँदासम्म कार्यनीति र रणनीतिक सवालमा कम्युनिस्ट पार्टी बन्न नसक्ने बताउनुभयो । उहाँले माओ विचारधारलाई कम्युनिस्ट आन्दोलनमा हतियारको रूपमा प्रयोग गर्नुको विकल्प छैन भन्नुभयो ।

कार्यक्रममा तराई–मधेश जनवादी मोर्चाका अध्यक्ष बद्रे आलम, प्रदेशसभा सांसद तारा जीसी, अखिल नेपाल टे«ड युनियन महासङ्घ (अन्टुक) का अध्यक्ष लोकराज भुसाललगायतले माओबारे आआफ्ना भनाइ राख्नुभएको थियो ।

वामपन्थी नेता चेतनाथ आचार्यको सञ्चालन र नेकपा (मसाल) रुपन्देही प्रवक्ता नारायण जिसीको अध्यक्षतामा उक्त कार्यक्रम सम्पन्न भएको हो ।