प्रकाश थापामगर/गोविन्दकुमार शर्मा, काठमाडौँ ।।
काठमाडौँ । नेकपा (मसाल) का प्रवक्ता रामप्रकाश पुरीले आफ्नो पार्टी क्रान्तिकारी नीति, सिद्धान्त लिएर जनतामा गएको बताउनुभएको छ ।
नेकपा (मसाल) बागमती प्रदेशको आयोजनामा काठमाडौँमा आयोजित १२८औँ माओदिवसको कार्यक्रममा प्रमुख अतिथिको आसनबाट सम्बोधन गर्दै उहाँले जनतामा जाने मात्रै ठुलो कुरो नभएको बताउनुभयो ।
‘जनताको माझमा त सबै गएका हुन्छन्’ उहाँले भन्नुभयो– ‘मुख्य कुरा हो क्रान्तिकारी नीति, सिद्धान्त र राजनीति । नेकपा (मसाल) क्रान्तिकारी नीति, सिद्धान्त लिएर जनताको माझमा गएको छ ।’
सम्बोधनको क्रममा उहाँले माओले माक्र्सवाद–लेनिनवादलाई पक्रेको बताउनुभयो । ‘माओले माक्र्सवादी–लेनिनवादी सिद्धान्तको आधारमा कम्युनिस्ट पार्टी निर्माण गर्नुभयो’ उहाँले भन्नुभयो– ‘यही सही नीति, सिद्धान्तकै कारणले माओको नेतृत्वमा चीनमा सर्वहारा क्रान्ति गर्न सम्भव भयो ।’
माओत्सेतुङभन्दा पहिलेका राजनीतिज्ञहरू पनि जनताको माझमा गएको बताउँदै उहाँले ठोकुवा गर्नुभयो– ‘माओत्सेतुङको नेतृत्वमा चिनियाँ कम्युनिस्ट पार्टी क्रान्तिकारी नीति, सिद्धान्त लिएर चिनियाँ जनताको माझमा गएको थियो ।’ त्यही कारणले चीनमा नयाँ जनवादी क्रान्ति र समाजवाद निर्माण सम्भव भएको उहाँले बताउनुभयो ।
कार्यक्रममा मन्तव्य राख्दै राष्ट्रिय जनमोर्चाका महासचिव जनकराज शर्माले माओले आफ्नै अध्यक्षतामा बसेको एउटा बैठकमा कम्युनिस्ट पार्टीका नेताहरूको जन्मदिवस नमनाउने निर्णय गराएको बताउनुभयो । ‘तर पछि माओत्सेतुङको क्रान्तिकारी माक्र्सवादी–लेनिनवादी नीति, सिद्धान्त सर्वहारा वर्गमाझ स्थापित भएपछि माओदिवस मनाउन थालियो’ उहाँले भन्नुभयो ।
सम्बोधनको क्रममा शर्माले माओले चीनमा सर्वहारा राजनीतिको वैज्ञानिक प्रयोग अगाडि बढाएको दावी गर्नुभयो । उहाँले भन्नुभयो– ‘माओ विचारधारा भनेको नै चीनको विशिष्ट परिस्थितिमा गरिएको वैज्ञानिक प्रयोग थियो ।’ उहाँले प्रष्ट्याउनुभयो– ‘तर माओ विचारधाराको प्रकृति सार्वभौम प्रकारको छ, विशुद्ध चिनियाँ परिवेशको होइन ।’
वामपन्थी नेता आनन्द शर्माले कार्यक्रममा सम्बोधन गर्दै देशको अहिलेको विशिष्ट परिस्थिति र कम्युनिस्ट आन्दोलनमा विद्यमान भड्कावको सन्दर्भमा माओदिवस मनाउनुको अर्थ माओको बाटोमा अघि बढ्नु भएको बताउनुभयो ।
‘अहिले हाम्रो देशमा विशिष्ट परिस्थिति निर्माण भएको छ; कम्युनिस्ट आन्दोलनभित्र विभिन्न खाले भड्कावको असर छ’ वामपन्थी नेता शर्माले भन्नुभयो– ‘यस्तो बेलामा हामीलाई माओ विचारधाराले लगातार क्रान्तिकारी दिशामा अगाडि बढ्न पथप्रदर्शन गर्दछ ।’
मन्तव्यको क्रममा उहाँले संशोधनवाद विरुद्ध सङ्घर्ष गर्दैै माओत्सेतुङले माक्र्सवाद–लेनिनवादलाई समृद्ध बनाएको बताउनुभयो । ‘त्यही क्रममा चिनियाँ जनतालाई सामन्तवाद र साम्राज्यवादी शोषणबाट मुक्त गरी समाजवादतर्फ अगाडि बढाउने काम भयो’ उहाँको प्रष्टीकरण थियो ।
कार्यक्रममा अखिल नेपाल महिला सङ्घकी अध्यक्ष मीना पुन, अखिल नेपाल जनजाति सम्मेलनका अध्यक्ष निमबहादुर बुढाथोकी, अखिल नेपाल शिक्षक सङ्घका अध्यक्ष सानोभाइ कार्की र प्रगतिशील लेखक सङ्घका केन्द्रीय सचिव प्रकाश थापामगरले पनि मन्तव्य राख्नुभएको थियो ।
नेकपा (मसाल) बागमती प्रदेश ब्युरोका प्रवक्ता समीर सिंहको अध्यक्षतामा अघि बढेको उक्त कार्यक्रमको सञ्चालन राष्ट्रिय जनमोर्चाका केन्द्रीय सचिव डम्बर पुरीले गर्नुभएको थियो ।
