काठमाडौँ । राष्ट्रिय जनमोर्चाले वामपन्थी नेता स्वनाम साथीको निधनप्रति दुःख व्यक्त गरेको छ । राजमो अध्यक्ष चित्रबहादुर केसीको हस्ताक्षरमा २०७७ पुस ११ गते जारी शोकवक्तव्यमा उहाँको निधनप्रति दुःख व्यक्त गरिएको हो ।

स्वनाम साथीको निधनप्रति श्रद्धाञ्जली तथा शोकसन्तप्त परिवारप्रति समवेदना प्रकट गरिएको शोकवक्तव्यको पूर्ण पाठ यस्तो छ–

“वामपन्थी नेता का. शशि शेरचन (स्वनाम साथी) को २०७७ पौष १० गते साँझ उपचारको क्रममा ७० वर्षको उमेरमा निधन भएको छ । उहाँको मृत्युबाट हामीले एक असल मित्र गुमाएको महसुस गरेका छौँ । का. स्वनामको निधनप्रति राष्ट्रिय जनमोर्चा गहिरो दुःख व्यक्त गर्दछ ।

का. स्वनामको निधनले नेपालको वामपन्थी तथा प्रजातान्त्रिक आन्दोलनलाई ठुलो क्षति पुगेको छ । उहाँ नेपालको कम्युनिस्ट आन्दोलनको एक मिलनसार, इमान्दार, स्वच्छ व्यक्तित्व हुनुहुन्थ्यो । का. स्वनामले लामो समयदेखि नेपालको वाम तथा लोकतान्त्रिक आन्दोलनमा सक्रिय भूमिका खेल्दै आउनुभएको थियो । उहाँले विकृति र विसङ्गतिका विरुद्ध अन्तिम समयसम्म सङघर्ष गर्दै आउनुभयो । तत्कालीन नेकपा (मसाल) र नेकपा (एकताकेन्द्र) बिच २०५९ मा भएको पार्टीएकतापश्चात् उहाँ एकीकृत पार्टीको प्रवक्तासमेत रहनुभएको थियो । मसालबाट प्रकाश समूह अलग भएपछि सोही समूहमा सामेल भएका स्वनाम पछिल्लो चरणमा नागरिक समाजको तर्फबाट सिमा बचाऔँ अभियानको नेतृत्व गर्दै आउनुभएको थियो । करिब एक महिना पहिलेदेखि कोरोना र उच्च निमोनियाबाट ग्रसित का. स्वनामको उपचारको क्रममा निधन भएको छ । उहाँको निधनले हामी सबैलाई दुःखी बनाएको छ । अग्रगामी परिवर्तनको पक्षमा भएका आन्दोलनहरूमा दृढतापूर्वक आत्मसाथ गर्दै सर्वदा मानवताको पक्षमा काम गर्न सक्नु नै उहाँप्रतिको सच्चा सम्मान हुने छ । हामीले त्यो अभिभारा पूरा गर्ने प्रयास गर्नुपर्दछ ।

अन्तमा, का. स्वनामप्रति हार्दिक श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गर्दछौँ ।”