काठमाडौँ । राष्ट्रिय जनमोर्चाले आगामी माघ मसान्तसम्मसम्म सङ्घर्षको कार्यक्रम घोषणा गरेको छ ।
प्रतिनिधि सभाको विघटन, गणतन्त्र, राष्ट्रियता र धर्म निरपेक्षताको रक्षा तथा सङ्घीयता र भ्रष्टाचारको विरुद्धमा सङ्घर्षको कार्यक्रम घोषणा गरिएको हो ।
राजमो अध्यक्ष चित्रबहादुर केसीको हस्ताक्षरमा पुस १० गते राती जारी प्रेसवक्तव्यमा सो जानकारी दिइएको हो ।
वक्तव्यको पूर्ण पाठ यस्तो छ-
“राष्ट्रिय जनमोर्चा केन्द्रीय कार्यालयको बैठक आज मिति २०७७ पौष १० गते बस्यो । बैठकले ओली नेतृत्वको सरकारद्वारा प्रतिनिधि सभाको विघटनको विरोध गर्दै देशव्यापी सङ्घर्षका कार्यक्रमहरू गर्ने निर्णय गरेको छ । मुख्यतः विघटित प्रतिनिधि सभाको पुनःस्थापनाको मागका साथै हाम्रो पहिलेको नारा गणतन्त्र, राष्ट्रियता र धर्म निरपेक्षताको रक्षा, सङ्घीयता र भ्रष्टाचारको विरोध तथा अन्य जनजीवनसँग सम्बन्धित विभिन्न विषयहरूमा पनि सङ्घर्षमा जोड दिइने छ । प्रतिनिधि सभाको विघटनको विरुद्धमा राजावादीबाहेक यसमा सहमति हुने राजनीतिक दल र सङ्गठनको स्तरमा पनि संयुक्त कार्यक्रम सञ्चालन गर्न प्रयत्न गरिने छ । राष्ट्रिय जनमोर्चाले नै सङ्घर्षका कार्यक्रमहरु गर्न मुख्य जोड दिइने छ । सङ्घर्षका कार्यक्रमहरू निम्नानुसार ठेगान गरेको छ :
१. पौष १९ गतेसम्म सङ्घर्षको तयारीको लागि प्रचारात्मक कार्यक्रम गर्ने । त्यस क्रममा विभिन्न पार्टी समितिको बैठक बस्ने, प्रदेशस्तरमा अनलाइन कार्यशाला गोष्ठी गर्ने, अपिल प्रकाशन र वितरण गर्ने तथा अन्य पक्षसँग संयुक्त कार्यक्रम गर्न पहलकदमी गर्ने ।
२. पौष २० गते सबै जिल्लामा जिल्लास्तरीय सङ्घर्षका कार्यक्रमको आयोजना गर्ने । सङ्घर्षका कार्यक्रम विभिन्न जिल्लाले आफ्नो स्थितिअनुसार निश्चित गर्ने छन् । त्यस प्रकारका कार्यक्रममा सभा, जुलुस, कोणसभा, मोटरसाइकल र्याली, पर्चा वितरण, मसाल जुलुस इत्यादि गर्न सकिने छ ।
३. पौष २० गतेपछि माघ मसान्तसम्म पालिका र वडा तहमा बढी प्रचारात्मक र सङ्घर्षका कार्यक्रम सञ्चालन गर्ने । पौष २० गतेको कार्यक्रम र माघ महिनाभरिका कार्यक्रम राष्ट्रिय जनमोर्चाले एकल वा अन्य मोर्चासँग मिलेर पनि बढीभन्दा बढी कार्यक्रम गर्न ध्यान दिइने छ ।”
