काठमाडौं । नेपाल कम्युनिष्ट पार्टी(नेकपा) का बरिष्ठ नेता झलनाथ खनालले ओलीमा गोमन साँप जस्तो प्रवृति भएको बताउनुभएको छ । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल प्रचण्ड र माधवकुमार नेपाल समूहको केन्द्रीय कमिटी बैठकको निर्णय तथा पार्टीका भावि कार्यक्रमको सम्बन्धमा जानकारी दिन शुक्रबार आयोजित पत्रकार सम्मेलनमा नेता खनालले प्रधानमन्त्री ओलीको गोमन साँपको जस्तो प्रवृति रहेको टिप्पणी गर्नुभयो ।
नेता खनालले नेकपा नफुटेको दाबीसमेत गर्नुभएको छ । सञ्चारकर्मीहरुको प्रश्नको जवाफ दिँदै बरिष्ठ नेता खनालले नेकपा अहिलेसम्म नफुटेको दाबी गर्नुभएको हो । उहाँले नेकपालाई फुट्न संविधानले नदिने तर्क गर्नुभयो ।
पार्टी फुट्न संसदीय दलमा ४० प्रतिशत पुर्याउनुपर्ने र केन्द्रीय कमिटीमा ४० प्रतिशत पुराउनुपर्ने व्यवस्था रहेको भन्दै बहुमत आफुहरुसँग भएकोले पार्टी नफुटेको उहाँको भनाई छ । पार्टीमा कोही चोइटिएपनि वाडा तहसम्म पार्टी संगठित रहेको बरिष्ठ नेता खनालले बताउनुभयो ।
नेकपा दुई पार्टीको एकीकरणबाट बनेको विशिष्ट परिस्थितिमा दुई अध्यक्ष राखिएको भएपनि दुवै अध्यक्ष बराबरी रहेको बरिष्ठ नेता खनालको भनाई छ ।
कार्यक्रममा नेकपाका नवनियुक्त अध्यक्ष माधवकुमार नेपालले प्रधानमन्त्री केपी शर्मा ओली गणतन्त्र र संघीयता बिरोधी भएको आरोप लगाउनुभयो । ओली कम्युनिष्ट बिचार, आचरणबाट बिचलन र पतनको बाटोमा हिडेको भन्दै कम्युनिष्ट आन्दोलन नै सिध्याईदिने हो कि भन्ने चिन्ता व्यक्त गर्नुभयो । ओलीमा गणतन्त्र, संघीयताप्रति अपनत्व, माया, मोह, ममता नभएको नेता नेपालको भनाई छ ।
यता अर्का अध्यक्ष पुष्पकमल दाहाल प्रचण्डले सर्वोच्च अदालतले संसद विघटनको कदम असंवैधानिक भनि फैसला गर्ने विश्वास व्यक्त गर्नुभएको छ । अध्यक्ष प्रचण्डले संसद विघटनको कदम विरुद्ध नेकपा सर्वोच्च अदालतमा गएको र अदालतले संसद विघटन अलोकतान्त्रिक, असंवैधानिक भनि फैसला गर्नेमा भरोसा रहेको बताउनुभएको हो । उहाँले सर्वोच्च अदालतले संविधानको व्यवस्था अनुसार नै फैसला गर्ने विश्वास व्यक्त गर्नुभयो ।
अध्यक्ष प्रचण्डले सरकारको असंवैधानिक र निरंकुश कदका विरुद्ध शुक्रबारदेखि नै आन्दोलन थालेको बताउँदै समस्या समाधान नभए अझ सशक्त आन्दोलन गर्ने घोषणा गर्नुभयो । सरकारले संविधान विपरितको कदम चालेकाले अग्रगमन चाहने शक्ति एकताबद्ध हुन उहाँले अपिल समेत गर्नुभयो ।
अध्यक्ष प्रचण्डले बहुमत सदस्यको उपस्थिति र हस्ताक्षरमा केन्द्रीय कमिटी बैठक बसेको र निर्वाचन आयोगमा सशरिर उपस्थित हुन सक्ने भन्दै पार्टीको नाम, चुनाव चिन्ह, लोगो लगायत पार्टीको आधिकारिकता आयोगले आफुहरुलाई दिनुपर्ने दाबी गर्नु भयो । उहाँले विद्यमान संविधान र ऐन बमोजिम निष्पक्ष निर्णय दिनेमा निर्वाचन आयोग प्रति विश्वास रहेको बताउनुभयो ।
