काठमाडौं । नेपाल कम्युनिष्ट पार्टी (मसाल) ले प्रतिनिधि सभा विघटनविरुद्ध देशब्यापी संघर्षको घोषणा गरेको छ । शुक्रबार बसेको पार्टी केन्द्रीय कार्यालयको बैठकले आन्दोलनका कार्यक्रमहरु सार्वजनिक गरेको हो ।
महामन्त्री मोहनविक्रम सिंहले शुक्रबार प्रेसित गर्नुभएको वक्तव्यमा यही पुस १९ गतेसम्म पार्टी, वैधानिक मोर्चा वा जनवर्गीय संगठनहरुले विभिन्न स्तरका बैठकहरु गरेर संघर्षको लागि आवश्यक तयारी गर्न प्रयत्न गर्ने र पुस २० गते सबै जिल्लामा जिल्लास्तरीय संघर्षका कार्यक्रमको आयोजना गरिने उल्लेख गरिएको छ ।
मसालले राजावादीलाई छाडेर संसदको विघटनका विरुद्ध संघर्षमा उत्रने विभिन्न पार्टी, संगठन वा जनवर्गीय संगठनहरुको स्तरमा पनि कार्यक्रमहरुको सञ्चालन गर्न सकिने स्पष्ट पारेको छ । तर मुख्य जोड आफ्नो बेग्लै र स्वतन्त्र कार्यक्रमहरुमा दिने पनि वक्तव्यमा जनाइएको छ ।
यस्तो छ वक्तव्य
१) नेकपा (मसाल) को आज २०७७ पौष १० गते बसेको केन्द्रीय कार्यालयको बैठकले विघटित संसदको पुर्नस्थापनाका लागि तल लेखिए अनुसार देशव्यापी रुपमा संघर्षको कार्यक्रम निश्चित गरेको छ ।
२) पौष १९ गतेसम्म संघर्र्षको तयारीका लागि प्रचारात्मक कार्यहरु गरिने छ । त्यस अनुसार १९ गतेसम्म प्रदेश स्तरमा जुम स्तरका कार्यशालाहरुको आयोजना गरेर आन्दोलनको पक्षमा बढी भन्दा बढी प्रचार र तयारी गर्ने प्रयत्न गरिनेछ ।
३) आगामी १९ गतेसम्म पार्टी, वैधानिक मोर्चा वा जनवर्गीय संगठनहरुले पनि विभिन्न स्तरका बैठकहरु गरेर संघर्षको लागि आवश्यक तयारी गर्न प्रयत्न गर्नुपर्ने छ ।
४) पौष २० गते सबै जिल्लामा जिल्ला स्तरीय संघर्षका कार्यक्रमको आयोजना गरिनेछ ।
५) संघर्षका कार्यक्रम विभिन्न जिल्लाले आफ्नो स्थिति अनुसार निश्चित गर्नेछन् । त्यस प्रकारका कार्यक्रममा सभा, जुलुश, मोटरसाइकल -याली, कोणसभा, पर्चा वितरण, मसाल जुलुश आदि गर्न हुन सक्नेछन् ।
६) पौष २० गतेपछि माघको मसान्तसम्म पालिका र वडा तहसम्म बढी भन्दा बढी प्रचारात्मक र संघर्षका कार्यक्रमको परिचालन गरिनेछ ।
७) पालिका वा वडा स्तरका उक्त कार्यक्रम बाहेक विभिन्न स्तरमा अन्य कार्यक्रम पनि सञ्चालन गर्न सकिनेछ ।
८) वैधानिक मोर्चा र जनवर्गीय संगठनहरुले २० गते वा त्यसपछि पुरै माघ महिनाभरि आफ्नो स्वतन्त्र पहलकदमीमा वा आपसमा मिलेर विभिन्न स्तरमा संघर्षका कार्यक्रम संचालन गर्न सक्नेछन् ।
९) राजावादीलाई छाडेर संसदको विघटनका विरुद्ध संघर्षमा उत्रने विभिन्न पार्टी, संगठन वा जनवर्गीय संगठनहरुको स्तरमा पनि कार्यक्रमहरुको संचालन गर्न सकिनेछ । तर मुख्य जोड आफ्नो बेग्लै र स्वतन्त्र कार्यक्रमहरुमा नै दिनुपर्नेछ ।
१०) उक्त संघर्षको कार्यक्रमको सिलसिलामा हाम्रो मुख्य माग विघटित संसदको पुनर्थापना नै हुनेछ । तर त्यसका साथसाथै हामीले पहिलेदेखि उठाउँदै आएका गणतन्त्र, राष्ट्रियता र धर्मनिरपेक्षताको रक्षा तथा संघीयता र भ्रष्टचारको विरुद्ध संघर्षको नारालाई पनि अगाडि बढाउदै लैजानु पर्नेछ तर अन्य पक्षहरुसित संयुक्त कार्यक्रम बनाउदा सहमति भएका मागका आधारमा आन्दोलनलाई अगाडि बढाउन सकिनेछ । २०७७ पौष १० गते
