काठमाडौं । पार्टी विभाजन गरी अलग अलग बैठक बसेका नेकपाका दुई खेमाको आज पनि केन्द्रीय समिति बैठक बस्दैछ । अध्यक्षद्वय पुष्पकमल दाहाल प्रचण्ड र माधवकुमार नेपाल पक्षको बबरमहलमा र प्रधानमन्त्री ओली समूहको बैठक बालुवाटारमा बस्नेछ ।
नेताहरुका अनुसार ओली समूह केन्द्रीय समितिको बैठकबाट चुनावको तयारीमा लाग्दैछ । प्रधानमन्त्री एवम् पार्टी अध्यक्ष केपी शर्मा ओलीले आफ्नो समूहका नेताहरुलाई चुनावको तयारीमा लाग्न निर्देशन दिने बताइएको छ ।
सरकारले पुस ५ गते संसद विघटन गरी आगामी वैशाख १७ र २७ गते निर्वाचनको घोषणा गरिसकेको छ । भने ओली पक्षले ११ सय ९९ सदस्यीय महाधिवेशन आयोजक समिति विस्तार गरी आउँदो मंसिर २ गते महाधिवेशनको मितिसमेत तय गरिसकेको छ ।
यता, प्रचण्ड–नेपाल पक्षले भने आन्दोलनको तयारी थालेको छ । संसद् विघटनविरुद्ध देशव्यापी आन्दोलनको कार्यक्रम घोषणा गर्ने तयारी गरिएको नेताहरुले बताएका छन् ।
वामदेव र बादल अन्यौलमा
नेकपा दुई चिरामा विभाजित भएपनि पार्टीको सचिवालय तहका दुई वरिष्ठ नेता वामदेव गौतम र रामबहादुर थापा बादल भने अझै अन्यौलमा देखिएका छन् ।
यद्यपी गृहमन्त्रीसमेत रहेका थापाको प्रधानमन्त्री ओलीतिरै बढी झुकाव देखिन्छ । थापा समूहका करिब सबै प्रचण्ड नेपाल समूहमा भएपनि थापा भने अझै खुलिसकेका छैनन् । स्रोतका अनुसार ओली समूहको उपाध्यक्ष भएर थापा सोही समूहमा लाग्ने देखिन्छ ।
यता, नेकपा उपाध्यक्ष रहेका वामदेव गौतमले प्रतिनिधि सभा विघटनसम्बन्धी विषयमा सर्वोच्च अदालतबाट फैसला नआउन्जेल पार्टीको कुनै पक्षमा पनि नखुल्ने संकेत गरेका छन् ।
ओली नेतृत्वको समूह र प्रचण्ड–नेपाल समूहले पार्टीका समानान्तर समिति र नेतृत्व चयन समेत गर्न थालेपछि गौतम भने कतैतर्फ पनि सहभागी भएका छैनन् । उनलाई दुवै समुहले आफूतर्फ तान्ने प्रयास गरिरहेका छन् ।
