काठमाडौँ । अखिल नेपाल बुद्धिजीवी सङ्घले प्रतिनिधि सभा पुनस्र्थापना गर्न माग गरेको छ । राष्ट्रपतिको प्रतिनिधि सभा विघटन गर्ने कदम अप्रजातान्त्रिक भएको भन्दै सङ्घले यस्तो माग गरेको हो ।
सङ्घका अध्यक्ष प्रा.डा. श्रीधर गौतमको हस्ताक्षरमा पुस ९ गते जारी प्रेसविज्ञप्ति यस्तो धारणा व्यक्त गरिएको छ ।
राष्ट्रपतिको कदमले देशमा राजनीतिक अस्थिरता निम्त्याउने बताउँदै सङ्घले गणतन्त्र, धर्म निरपेक्षता र लोकतन्त्रलाई सुदृढ गर्नुपर्नेमा जोड दिएको छ ।
कोराना महामारीले देश पीडित भएका बेला यस महामारीको नियन्त्रणका साथै विकास र जनताको रोजगारी वृद्धितर्फ ध्यानाकर्षण गराइएको प्रेसविज्ञप्तिको पूर्ण पाठ यस्तो छ–
“२०७७ पुस ५ गते आइतबार प्रधानमन्त्रीको सिफारिसमा राष्ट्रपति विद्यादेवी भण्डारीबाट प्रतिनिधि सभाको विघटनको घोषणालाई अखिल नेपाल बुद्धिजीवी सङ्घ अप्रजातान्त्रिक कदमको रूपमा ठहर गर्दै उक्त कार्यको विरोध गर्दछ । साथै वर्तमान प्रतिनिधि सभाको पुनस्र्थापनाको माग पनि जोड्दार रूपमा गर्दछ ।
विद्यमान प्रतिनिधि सभाको विघटनले देशमा थप राजनैतिक अस्थिरता आउने र विदेशी शक्तिलाई चलखेल गर्ने मौका मिल्ने छ । अहिलेको आवश्यकता भनेको देशमा स्थापित गणतान्त्रिक व्यवस्था, धर्म निरपेक्षता र लोकतन्त्रलाई सुदृढ बनाउँदै लैजानु हो । तर सत्तासिन पार्टीभित्रको आन्तरिक शक्तिसङ्घर्ष र व्यक्तिगत वैमनस्यताको कारणले प्रतिनिधि सभालाई विघटन गर्नु अलोकतान्त्रिक कदम हो; र, यस कार्यले गर्दा प्राप्त अधिकारसमेत गुम्न गई देशमा अधिनायकवादी शक्तिहरूले गणतन्त्रलाई नै समाप्त पार्न सक्ने हुनाले पनि प्रतिनिधि सभाको पुनस्र्थापना हुनुपर्छ; र, जनतालाई अनावश्यक रूपमा थप बोझ थप्नु हुँदैन ।
कोरोना महामारीले पीडित भएको अवस्थामा सरकारको सम्पूर्ण ध्यान महामारीलाई नियन्त्रण गर्न, विकास र जनताको रोजगारी बढाउने कार्यमा हुनुपर्दछ ।”
