काठमाडौँ । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्ड र माधवकुमार नेपाल समूहले मङ्गलबारको केन्द्रीय कमिटीको बैठकबाट भएका निर्णयहरू निर्वाचन आयोगमा बुझाएको छ । प्रचण्ड–माधव समूहको मङ्गलबार बसेको केन्द्रीय कमिटीको निर्णयबाट अध्यक्ष केपी शर्मा ओलीलाई अनुशासनको कारबाही गरेको निर्णय लिएर नेताहरू बुधबार आयोग पुगेका हुन् ।
नेताहरूले केन्द्रीय कमिटीका बहुमत सदस्यहरूको हस्ताक्षरसहित बैठकका निर्णयहरू आयोगमा बुझाएका छन् । नेकपाका नेता सुरेन्द्र पाण्डेलगायतका नेताहरू निर्वाचन आयोग पुगेर अध्यक्ष ओलीलाई अध्यक्षबाट निस्कासन गरी वरिष्ठ नेता नेपाललाई अध्यक्ष चयन गरेको निर्णय आयोगमा पेस गरेको हो ।
केन्द्रीय कमिटीका निर्णयहरू आयोगमा पेस गरेपछि पत्रकारहरूसँग सङ्क्षिप्त कुराकानी गर्दै नेता पाण्डेले २ सय ८७ जनाको बैठकमा उपस्थित भएर निर्णय गरेको हस्ताक्षर र तीन जना उपस्थित हुन नसकेको निवेदनसहित दुई सय ९० जनाको हस्ताक्षरसहितको निर्णय आयोगमा बुझाएको बताउनुभयो ।
उहाँले तत्कालीन नेकपा (एमाले) र एकीकृत माओवादीबिचको एकतापछि कायम भएको चार सय ४१ केन्द्रीय कमिटी र पछि थप भएका चार जना सहित चार सय ४५ जना नै केन्द्रीय सदस्यहरूको अन्तिम नामावली भएको बताउनुभयो । उहाँले चार सय ४५ मध्ये तीन जनाको मृत्यु भएको, पाँच जना विभिन्न संवैधानिक निकायमा नियुक्ति पाएको र तीन जना राजदूत भएर गएपछि कायम भएको चार सय ३४ केन्द्रीय सदस्यमध्येको बहुमत सदस्यहरूको निर्णय नै अन्तिम हुने बताउनुभयो । उहाँले करिब ७० प्रतिशत केन्द्रीय सदस्यहरू आफूहरूसँग रहेको पनि दाबी गर्नुभयो ।
मङ्गलबार बसेको प्रचण्ड–माधव समूहको केन्द्रीय कमिटीको बैठकले अध्यक्ष ओलीलाई अनुशासनको कारबाही गरी अध्यक्षबाट निस्कासन गरी वरिष्ठ नेता माधवकुमार नेपाललाई अध्यक्ष चयन गर्ने निर्णय गरेको थियो ।
सरकारले प्रतिनिधि सभा विघटन गरेपछि नेकपा विभाजनतर्फ उन्मुख भएको छ । अध्यक्ष ओली समूहले पनि मङ्गलबार बालुवाटारमा केन्द्रीय सदस्यहरूको भेला गरेर आफ्नो समूह नै आधिकारिक भएको दाबी गरेको थियो । अध्यक्ष ओली समूहको केन्द्रीय सदस्यहरूको बैठकले केन्द्रीय कमिटीमा पाँच सय ५६ जना सदस्यहरू थप गरेको थियो । उक्त निर्णय ओली पक्षले मङ्गलबार नै आयोगलाई बुझाइसकेको छ ।
