श्यामलाल पोखरेल, बुटवल ।
राष्ट्रिय जनमोर्चाले यतिखेर गणतन्त्रको विरोधमा राजावादी र भारतीय चलखेल बढेको ठहर गरेको छ । राष्ट्रिय जनमोर्चा रुपन्देहीले बुधबार (पुस ८ गते) बुटवलमा आयोजित विरोधसभामा मन्तव्य राख्ने राजमो नेताहरूले यस्तो अभिव्यक्ति दिनुभएको हो ।
विरोधसभामा बोल्ने राजमोका नेताहरूले प्रधानमन्त्री ओलीले प्रतिनिधि सभा विघटन गरेर गम्भीर गल्ती गरेको बताउनुभयो । संसद विघटन भएपछि राजावादीहरूको झनै चलखेल बढेको र भारतले आफ्नो अनुकूलमा नेपालमाथि हस्तक्षेप बढाउँदा गणतन्त्र सङ्कटमा परेको उहाँहरूको दावी थियो ।
सभामा बोल्दै नेकपा (मसाल) रुपन्देहीका प्रवक्ता नारायण जिसीले भारतको बढ्दो हस्तक्षेप र राजावादीहरूको चलखेल बढेका बेला प्रतिनिधि सभा विघटन हुँदा गणतन्त्र सङ्कटमा परेको बताउनुभयो । सङ्घीय संरचनानुसारका प्रदेशसभा खारेज गर्ने बेलामा प्रधानमन्त्री ओलीले प्रतिनिधि विघटन गरेर गम्भीर गल्ती गरेको उहाँको भनाइ थियो । प्रवक्ता जिसीले ओलीको कदम गलत भएको बताउँदै देशभर विरोधसभा आयोजना गरेर गणतन्त्र, राष्ट्रियता र धर्म निरपेक्षताको पक्षमा तथा सङ्घीयता, भ्रष्टाचारको विरुद्धमा जनतालाई सचेत गराइने बताउनुभयो ।
राष्ट्रिय जनमोर्चा रुपन्देही सचिव टानबहादुर केसीले सङ्घीयताले कमजोर बनाएको र कोरोना भाइरस लागेका नागरिकलाई उपचार गराउन सरकार असफल भएको अवस्थामा प्रधानमन्त्री ओलीले प्रतिनिधि सभा विघटन गरेकै कारण देशमा सङ्कट उत्पन्न भएको दावी गर्नुभयो ।
कार्यक्रममा अखिल (छैठौं) का रुपन्देही अध्यक्ष सरोजमान सिंह, अखिल नेपाल जनजाति सम्मेलनका लुम्बिनी प्रदेश सदस्य विमलकुमार श्रीसले बोल्दै प्रतिनिधि सभा विघटनसँगै राजनीतिक सङ्कट उत्पन्न भएको बताउनुभयो । आगामी वैशाखमा चुनाव हुने सम्भावना नरहेको र सङ्घीयता खारेज नगर्दासम्म देशले सही प्रकारको निकास नपाउने उहाँले बताउनुभयो ।
विरोधसभा केपी पोखरेलको अध्यक्षता तथा मुक्ति सापकोटाको सञ्चालनमा सम्पन्न भएको थियो ।
