काठमाडौँ । नेपाल कम्युनिस्ट पार्टी (नेकपा) को प्रचण्ड–नेपाल समूहले संसदीय दलको नेताबाट प्रधानमन्त्री केपी शर्मा ओलीलाई हटाएर पुष्पकमल दाहाल प्रचण्डलाई चयन गरेको छ ।
बानेश्वरस्थित संसद भवनमा आज बुधबार भएको संसदीय दलको बैठकले ओलीलाई दलको नेताबाट हटाएको हो । मङ्गलबार अध्यक्ष चुनिएका माधवकुमार नेपालको प्रस्तावमा प्रचण्ड संसदीय दलको नेता चुनिएका हुन् ।
नेकपाको प्रचण्ड–नेपाल पक्षको मङ्गलबार बसेको केन्द्रीय समिति बैठकबाट पार्टीको अध्यक्ष पदबाट पनि ओलीलाई हटाई माधवकुमार नेपाललाई अध्यक्ष चयन गरेको थियो ।
नेकपाको मौजुदा ४४७ मध्ये ३१५ जना केन्द्रीय समिति सदस्य उपस्थित रहेको सो बैठकले ओलीलाई अध्यक्ष पदबाट हटाएको उनीहरूले जनाएका छन् ।
यता, ओलीले भने बेग्लै केन्द्रीय समितिको बैठक बसी ११ सय ९९ सदस्यीय महाधिवेशन आयोजक समिति बनाउनुका साथै आगामी मङ्सिर २ गते महाधिवेशन तोकिसकेको छ ।
