काठमाडौं । संसद सचिवालयमा ९० जना सांसदहरुले प्रधानमन्त्री केपी शर्मा ओली विरुद्ध अविश्वासको प्रस्ताव दर्ता भएको पाइएको छ । आइतबार विहान सत्तारुढ दल नेपाल कम्युनिष्ट पार्टी नेकपाका ९० जना सांसदहरुले प्रधानमन्त्री ओली विरुद्धको अविश्वासको प्रस्ताव दर्ता गराएका हुन् ।
सचिवालयका प्रवक्ता डा. रोजनाथ पाण्डेले दिनुभएको जानकारी अनुसार अविश्वासको प्रस्तावमा दर्ता समय विहान १० बजेर ५० मिनेटको रहेको छ । तर संसद सचिवालयले सो समय सच्याएर ३ बजेर ३० मिनेटमा दर्ता भएको बताएको छ ।
सो प्रस्तावमा प्रधानमन्त्री केपी शर्मा ओलीलाई हटाएर पुष्पकमल दाहाललाई प्रधानमन्त्री बनाउन प्रस्ताव गरिएको छ । त्यसलगत्तै बसेको मन्त्रिपरिषद बैठकले संसद विघटनको सिफारिस गरेको थियो भने राष्ट्रपति विद्यादेवी भण्डारीबाट अनुमोदन भएको छ।
यता, मन्त्रिपरिषदको सिफारिसमा राष्ट्रपति विद्यादेवी भण्डारीले संसद विघटन गरेपछि नेकपाकै नेता कार्यकर्ताहरु त्यसको विरोधमा सडकमा उत्रिएका छन् भने प्रचण्ड–नेपाल पक्षमा सात मन्त्रीहरुले राजीनामासमेत दिएका छन् ।
मन्त्रीहरुमा शिक्षामन्त्री गिरीराजमणि पोखरेल, उर्जामन्त्री वर्षमान पुन, कृषिमन्त्री घनश्याम भुषाल, पर्यटनमन्त्री योगेश भट्टराई, वनमन्त्री शक्ति बस्नेत, श्रममन्त्री रामेश्वर राय यादव र खानेपानीमन्त्री विना मगरले सामूहिक राजीनामा दिएका हुन् ।
आइतबार मन्त्रिपरिषदको सिफारिसमा राष्ट्रपतिबाट संसद विघटन र आगामी वैशाख १७ र २७ गते आम निर्वाचनको मिति घोषणा गरिएको छ ।
