नवराज पौडेल, कपिलवस्तु ।
राष्ट्रिय जनमोर्चा कपिलवस्तुले संघीयता खारेजी र प्रतिगमनको खतराविरुद्ध जिल्लाको तीन स्थानमा कोण सभा सम्पन्न गरेको छ ।
‘गणतन्त्र, राष्ट्रियता र धर्मनिरपेक्षताको रक्षा गरौँ, संघीयता र भ्रष्टाचारको विरोध गरौँ’ भन्ने नाराका साथ राष्ट्रिय जनमोर्चा कपिलवस्तुले एकहप्ते अभियान सञ्चालन गरिरहेको छ । सोही क्रममा आज (आइतबार) जिल्लाको बहादुरगञ्ज, कृष्णनगर र वाणगंगा नगरपालिकाको भलवाडमा कोण सभा आयोजना गरिएको हो ।
बहादुरगञ्ज र कृष्णनगरमा भएको सभालाई राष्ट्रिय जनमोर्चा जिल्ला सल्लाहाकार तथा अखिल नेपाल ट्रेड युनियन महासंघ (अन्टुक) का केन्द्रीय सदस्य केरसिंह अदैले सम्बोधन गर्दै देशको तत्कालीन राजनैतिक अवस्था बारेमा प्रष्ट पार्नु भएको थियो । उहाँले व्यवस्था हरू फेरिँदै गणतन्त्र आए पनि मधेसी जनता किसान, मजदुरहरूमा कुनै परिवर्तन नआएको बताउँदै ठूला दल, मधेसवादी दलले वास्तविक रूपमा जनताको हितमा काम गर्न नसकेको आरोप लगाउनु भयो ।
नेता अदैले संघीयता ल्याएपछि, हक अधिकार सुनिश्चित हुन्छ, समृद्धि हुन्छ, गाउँ गाउँमा सिंहदरबार हुन्छ भन्दै उनै नाम फेरिएका ठुला बडा नेताले बाँडेको आश्वासन माछो माछो भ्यागुतो भएको बताउनु भयो ।
कार्यक्रमलाई अखिल नेपाल किसान महासंघका केन्द्रीय सदस्य कर्मराज चौधरी, राष्ट्रिय जनमोर्चा महाराजगञ्ज नगर समितिका अध्यक्ष जमील अहमदले पनि सम्बोधन गर्नु भएको थियो । सभाको सञ्चालन राजमो जिल्ला कोषाध्यक्ष चेतनारायण खनालले गर्नु भएको थियो ।
यसैगरी वाणगंगा नगरपालिकाको भलवाडमा भएको कोण सभालाई राष्ट्रिय जनमोर्चाका जिल्ला अध्यक्ष दधिराम आचार्य र जिल्ला सदस्य डबलसिंह जिसीले सम्बोधन गर्नु भएको थियो भने सञ्चालन राजमो जिल्ला उपाध्यक्ष रामप्रसाद बेल्बासेले गर्नु भएको थियो ।
