सुमन आचार्य, चितवन ।
राष्ट्रिय जनमोर्चाले बिहीबार चितवनमा विरोध प्रदर्शन गरेको छ । ‘राष्ट्रियता, गणतन्त्र र धर्मनिरपेक्षताको रक्षा गरौँ, संघीयता, भ्रष्टाचार र एमसीसी सम्झौताको विरोध गरौँ’ भन्ने मूल नाराका साथ भरतपुरमा विरोध प्रदर्शन गरिएको हो ।
जिल्ला प्रशासन कार्यालय चोकबाट शुरु भएको नाराजुलुस सहितको र्याली बाइपासरोड, जिल्ला मालपोत कार्यालय चोक हुँदै चौबिसकोठी पुगेर सभामा परिणत भएको थियो ।
-र्यालिमा ‘राष्ट्रियताको रक्षा गरौँ, गणतन्त्रको रक्षा गरौँ, धर्म निरपेक्षताको रक्षा गरौँ, संघीयता खारेज गर, प्रतिगामी तत्व मुर्दावाद, गणतन्त्र जिन्दावाद, नेकपा (मसाल) जिन्दावाद, राष्ट्रिय जनमोर्चा जिन्दावाद, एमसीसी सम्झौता खारेज गर, भ्रष्टाचारको अन्त्य गर, बढ्दो महंगी नियन्त्रण गर लगायतका नारा लगाइएको थियो ।
जुलुशपछि चौबिसकोठीमा आयोजना गरिएको कोणसभालाई सम्बोधन गर्दै राष्ट्रिय जनमोर्चा जिल्ला अध्यक्ष एवम् केन्द्रीय सचिव डम्बर पुरिले नेपाली जनताहरुको बलिदानिपूर्ण संघर्षबाट प्राप्त गणतन्त्रमाथि गिद्धेनजर लगाउँदै देशलाई पछाडी धकेल्ने प्रयास भैरहेको बताउनुभयो ।
साथै उहाँले गणतन्त्रको रक्षा गर्नका लागि सचेत नगरिकहरुले खबरदारी गर्नु आजको आवश्यकता भएको बताउनुभयो । नेता पुरिले अहिले संघीयताको विरोध गर्ने राजावादी मण्डलेहरु हिजो बिहानका दिनमा हामीले सन्चालन गरेका संघीयता विरोधी कार्यक्रममा हाम्रा नाक काटिंदा कुन दुलोमा बसेर रमिता हेरेर बसेका थिय भनी प्रश्न गर्नुभयो ।
कार्यक्रममा नेकपा (मसाल) का जिल्ला प्रवक्ता मेघराज ढकालले संघीयताको खारेजी अहिलेको परिस्थितिमा अनिवार्य भएको जिकिर गर्नुभयो । वैदेशिक ऋण बढाएर र जनतालाई जबर्जस्ती कर वृद्धि थोपरेर संघीयता धान्न नसकिने कुरामा जोड दिनुभयो । इतिहासका कालखण्डमा नेकपा (मसाल) ले व्यक्त गरेका विचारहरु क्रमश मेल खाँदै गएको प्रसंगलाई कोट्याउँदै अझै पनि ढिला नगरी संघीयतालाई जरैदेखी उखेलेर फाल्न आवस्यक रहेको बताउनुभयो ।
विरोध सभाको सञ्चालन राष्ट्रिय जनमोर्चा भरतपुर महानगर समितिका सचिव सुमन शर्मा आचार्यले गर्नुभएको थियो ।
