गणेश अधिकारी, पोखरा ।
राष्ट्रिय जनमोर्चा कास्कीले संघीयता तथा प्रतिगमनको खतराविरुद्ध पोखरामा विरोध सभा आयोजना गरेको छ । राजमोले ‘राष्ट्रियता र गणतन्त्रको रक्षा गरौँ, संघीयताको खारेज गरौँ’ भन्ने नाराका साथ बिहीबार देशब्यापी आयोजना गरेको विरोध प्रदर्शनका क्रममा पोखरामा पनि विरोध सभा सम्पन्न भएको हो ।

सभालाक्षर्् सम्बोधन गर्दै राजमो गण्डकी प्रदेशका अध्यक्ष शंकर बरालले बर्तमान सरकार भारतीय साम्राज्यवाद र अमेरिकी साम्राज्यवादको घेरामा परेको आरोप लगाउनुभयो । उहाँले सरकारले जनताका समस्या समाधान गर्न ध्यान नदिएको, कोभिड–१९ का बिरामीलाई पर्याप्त मात्रामा स्वास्थ्य उपचार नपाएको, सरकारका गलत क्रियाकलापले गर्दा प्रतिगामी शक्तिहरुले टाउको उठाउने मौका पाएको बताउनुभयो ।

नेता बरालले विदेशी हस्तक्षेप र प्रतिगमनको खतराविरुद्ध संघर्ष गर्दै संघीयता खारेजीका लागि जोड दिनुपर्ने आवश्यकता औँल्याउनुभयो ।
राजमो जिल्ला सहसचिव बिक्रम थापाले सञ्चालन गरेको कार्यक्रममा नेकपा (मसाल) का जिल्ला प्रवक्ता चन्द्रबहादुर केसी, राजमो जिल्ला अध्यक्ष रविमोहन ढकाल, अखिल नेपाल ट्रेड युनियन महासंघका केन्द्रीय सदस्य नामबहादुर बाठामगर, अखिल (छैठौं) का केन्द्रीय उपाध्यक्ष गणेश अधिकारीलगायत नेताहरुले सम्बोधन गर्नुभएको थियो ।