काठमाडौं । प्रधानमन्त्री केपी शर्मा ओलीको आह्वानमा आज (मंगलबार) सर्वदलीय बैठक बस्दैछ । बैठक अहिले बिहान ११ बजे बालुवाटारस्थित प्रधानमन्त्री निवासमा बस्न लागेको हो ।
प्रधानमन्त्री ओलीले समसामयिक विषयमा छलफलका लागि सर्वदलीय बैठक बोलाउनुभएको हो । बैठकमा राष्ट्रिय जनमोर्चाका तर्फबाट महासचिव जनकराज शर्मा र अखिल नेपाल किसान महासंघका अध्यक्ष भैरवराज रेग्मी सहभागी हुनुहुनेछ ।
राजमोले सर्वदलीय बैठकमा प्रतिगमनको खतरालाई महत्वका साथ उठाउने भएको छ । त्यससँगै कोरोना संक्रमितहरुको प्रभावकारी उपचार, संसदको बैठक आह्वान, भ्रष्टाचारलगायतका विषयमा पार्टीको धारणा राखिने महासचिव शर्माले जानकारी दिनुभयो ।
‘हामीले प्रतिगमनको खतराको विषयमा आफ्ना धारणा राख्नेछौं’ महासचिव शर्माले युगदर्शनसँग भन्नुभयो, ‘त्यसका साथै संसदको बैठक बोलाउन ढिला भइसकेको छ, कोरोना संक्रमितहरुको उपचार प्रभावकारी हुन सकिरहेको छैन । भष्टाचार बढेको बढ्यै छ । सरकारले बेरोजगार युवाहरुका लागि प्रभावकारी कार्यक्रम ल्याउन सकेको छैन । यीनै विषयमा हाम्रा धारणा राख्नेछौं ।’
यस्तै, राजमोले किसानका समस्याहरुबारे पनि कुरा उठाउनेछ । किसानले मल, विउ पाउन नसकेको, कृषि उपजमा विचौलिया हावी भइरहेको, सरकारले किसानलाई सहुलियत दिन नसकेको बारेमा कुरा राख्ने राजमो नेता एवं किसान महासंघका अध्यक्ष रेग्मीले बताउनुभयो।
सर्वदलीय बैठक अघि मन्त्रिपरिषदको बैठक बसिरहेको छ । प्रधानमन्त्री ओलीका प्रेस सल्लाहकार सूर्य थापाका अनुसार प्रधानमन्त्री ओलीकी बडीआमाको निधन भएपछि सोमबार स्थगित मन्त्रिपरिषद् बैठक आज राखिएको हो ।
मन्त्रिपरिषद बैठक सकिएपछि सर्वदलीय बैठक बस्नेछ ।
