श्यामलाल पोखरेल/ बुटवल ।।
राष्ट्रिय जनमोर्चाका अध्यक्ष चित्रबहादुर केसीले देशमा प्रतिगमनको खतरा रहेको बताउनुभएको छ । सरकारको कमजोर गतिविधिका कारण प्रतिगामी राजावादीहरूको सक्रियता बढेको बताउनुभयो ।
शनिबार रुपन्देहीमा प्रगतिशील पत्रकार सङ्घका प्रतिनिधिहरूसंगको भेटमा अध्यक्ष केसीले प्रतिगामीहरूसँग सचेत रहन आग्रह गर्नुभयो । देशभर चलिरहेको राजावादीहरूको गतिविधिलाई हल्का रूपमा लिन नहुने अध्यक्ष चित्रबहादुरको भनाइ छ ।
राजावादी र हिन्दूवादी संस्थाहरूले बहुदलीय व्यवस्थाका विरुद्धमा २०१७ सालमा पनि अहिलेजस्तै गतिविधि सञ्चालन गरेको स्मरण गर्दै अध्यक्ष केसीले जसको परिणामस्वरूप २०१७ पुस १ गतेको काण्ड घटेको र त्यसका विरुद्ध नेपाली जनताले ३० वर्ष लामो सङ्घर्ष गर्नुपरेको बताउनुभयो ।
२०४६ सालपछि प्राप्त बहुदलीय व्यवस्थालाई समाप्त पार्न राजावादीहरूले गतिविधि बढाएको र २०६१ माघ १९ गते शाहीकाल घोषणा भएको पनि अध्यक्ष केसीले स्मरण गर्नुभयो । राजावादीहरूको बढिरहेको गतिविधिले २०१७ पुस १ र ०६१ माघ १९ गतेको नियति दोहोरिन सक्ने भएकाले प्रतिगामीहरूका विरुद्व, गणतन्त्र र धर्म निरपेक्षता जोगाउन गणतन्त्रवादी शक्ति एक हुनुपर्ने बताउनुभयो । राजावादीहरूको गतिविधिका विरुद्ध, गणतन्त्र र धर्म निरपेक्षताको पक्षमा गणतन्त्र पक्षधर शक्ति एक हुनुपर्ने बताउनुभयो ।
उहाँले गणतन्त्रको विकल्प राजतन्त्र हुनै नसक्ने उल्लेख गर्दै नेपाली जनताले लामो समय लडेर ल्याएको गणतन्त्र बचाउनुको अर्को कुनै विकल्प छैन भन्नुभयो । वर्तमान सरकारका गलत गतिविधि जनविरोधी तथा भ्रष्ट र कुशासन क्रियाकलापहरूबाट जनतामा निरासा छाएको बताउनुभयो ।
सङ्घीयताका कारण देश सङ्कटमा परिसकेको दावी गर्दै पूर्व उपप्रधानमन्त्रीसमेत रहनुभएका अध्यक्ष केसीले नेपाली जनताले सङ्घीयताबो बोझलाई धान्नै नसक्ने बताउनुभयो ।
