काठमाडौं । नेपाल कम्युनिष्ट पार्टी (मसाल) ले देशको अहिलेको अवस्था विस. २०१७ साल पुष १ अघिको जस्तो भएको बताएको छ । २०१७ साल पुष १ गते विपि कोइराला नेतृत्वको तत्कालिन बहुमत प्राप्त सरकारलाई राजा महेन्द्रले अपदस्थ गरेका थिए ।
राजनीतिक दलहरुबीचको खिचातानी एवम् सत्तारुढ दलभित्रको झगडाका कारण तत्कालिन राजनीतिक दल र संसदीय व्यवस्था अलोकप्रिय बन्दै गएको अवस्थामा राजा महेन्द्रले ‘कु’ गर्ने आधार तयार भएको थियो ।
अहिले पनि देशमा बढ्दै गएको भ्रष्टाचार, अव्यवस्था तथा सत्तारुढ दलभित्रको सत्तास्वार्थका कारण राजावादीहरु देशैभर सक्रिय भइरहेका छन् भने भारतीय साम्राज्यवादले हिन्दुराष्ट्र घोषणा तथा त्यसको संरक्षणका राजतन्त्रसमेत पुनर्थापना गर्न नेपालमा चलखेल बढाइएरहेको छ। यो अवस्थामा नेकपा (मसाल) ले पुनः प्रतिगमनको खतरा रहेको भन्दै सचेत गराएको छ ।
साथै मसालले गणतन्त्र र धर्मनिरपेक्षता रक्षाका लागि संघर्षमा जोड दिँदै आम जनतालाई सहयोगको लागि पनि अपिल गरेको छ । महामन्त्री मोहनविक्रम सिंहले शुक्रबार प्रेशित गर्नुभएको वक्तव्यमा भनिएको छ :
१. नेपाल कम्युनिस्ट पार्टी(मसाल)को आजै बसेको पीवीको भर्चुअल बैठकले ‘गणतन्त्र राष्ट्रियता र धर्मनिरपेक्षताको रक्षा गरौँ, संघीयता र भ्रष्टाचारका विरुद्ध संघर्ष गरौँ’ भन्ने नाराका साथ देशव्यापी रुपमा संघर्षका कार्यक्रमहरु संचालन गर्ने निर्णय गरेको छ । संघर्षको त्यो कार्यक्रमलाई कोरोना भाइरसले पैदा गरेको स्थितिमाथि ध्यान दिँदै अगाडि बढाउने नीति अपनाइनेछ ।
२. संघर्षको पहिलो चरणमा प्रचारात्मक कार्यक्रम संचालन गरिनेछ । त्यस अनुसार पार्टी, मोर्चा वा जनवर्गीय संगठनहरुका तर्फबाट विभिन्न स्तरमा वक्तव्य दिने पर्चाहरुको वितरण गर्ने वा भर्चुअल कार्यक्रमहरुको संचालन गरिनेछ । दोश्रो चरणमा सार्वजनिक रुपमा सामाजिक दुरी कायम राख्दै सभा, जुलुस, कोणसभा आदि कार्यक्रमहरु संचालन गर्ने प्रयास गरिनेछ ।
३. आज देशमा प्रतिगामीहरुका गतिविधिहरु बढ्दै गइरहेका छन् । त्यसले गर्दा २०१७ साल पौष १ गते वा २०६१ साल माघ १९ गते भन्दा पहिलेको जस्तो स्थितिको सिर्जना हुँदै गइरहेको छ भन्ने निष्कर्षमा हाम्रो पार्टी पुगेको छ । त्यस प्रकारका गतिविधिहरुलाई हल्का रुपमा लिनु गम्भिर प्रकारको गल्ती, राजनीतिक अपरिपक्वता र अदुरदर्शिता तथा देश र जनताको लागि अत्यन्त घातक हुनेछ भन्ने हाम्रो पार्टीको ठहर छ । यो अवस्थामा गणतन्त्र र धर्मनिरपेक्षताको रक्षाको लागि संघर्ष गर्नु राष्ट्रिय आवश्यकता बन्न गएको छ ।
४. लिपुलेक, कालापानी र लिम्पियाधुरामा भारतीय साम्राज्यवादको अतिक्रमण, तराईको विखण्डनका लागि भइरहेको पृथकतावादी गतिविधि र सुस्ता सहित देशका कैयौँ भागहरुमा भारतद्वारा भएको सीमा अतिक्रमण समेतका कारणले राष्ट्रियताको रक्षाका लागि संघर्ष गर्नुपर्ने आजको राष्ट्रिय आवश्यकता भएको छ ।
५. हामीले संघीयताका विरुद्ध पहिलेदेखि नै संघर्ष गर्र्द आएका छौँ । अब व्यवहारले नै त्यो देशका लागि राष्ट्रघाती, विकासका लागि ठूलो वाधा, जनजीवनको लागि पनि धेरै नै हानिकारक भएको कुरा प्रष्ट हुँदै गएको छ । त्यसकारण संघीयता तथा त्यसको प्रादेशिक संरचनालाई खारेज गर्न पनि संघर्ष गर्नु आजको तात्कालिक आवश्यकता भएको छ ।
६. अहिले देशमा बढिरहेको भ्रष्टाचार र त्यसको संरक्षण गर्ने सरकारको नीतिका कारणले भ्रष्टाचार पनि देशको गम्भिर समस्या भएको छ । त्यसको परिणामस्वरुप सरकारका सबै नीति र क्रियाकलापहरु, प्रशासनिक कार्य र विकासका कार्यक्रमहरु पनि नराम्ररी प्रभावित भएका छन् । त्यसकारण हाम्रो पार्टीले भ्रष्टाचार विरुद्धको संघर्षमा पनि विशेष जोड दिन्छ ।
७. हाम्रो पार्टीले उपर्युक्त विषयहरुमा मिल्नसक्ने विषयहरुमा अन्य पक्षहरुसित पनि मिलेर र सहमति हुन नसकेका विषयहरुमा आफ्नो स्वतन्त्र पहलकदमीमा पनि संघर्षका कार्यक्रमहरु संचालन गर्ने प्रयत्न गर्नेछ ।
८. संघर्षको पहिलो चरणको कार्यक्रम तत्काल नै शुरु गरिने छ । पहिलो चरणको कार्यक्रम सम्पन्न भएपछि दोश्रो चरणको कार्यक्रम र मिति पछि ठेगान गरिनेछ ।
९. अन्तमा हाम्रो पार्टीले गणतन्त्र, राष्ट्रियता र धर्मनिरपेक्षताको रक्षा तथा संघीयता र भ्रष्टाचारका विरुद्धको संघर्षमा व्यापक समर्थन र सहभागिताका लागि सम्पूर्ण जनतासित अपील गर्दछ ।
२०७७/०८/१९
मोहनविक्रम सिंह
महामन्त्री
