काठमाडौं । राष्ट्रिय जनमोर्चाले सरकारले भ्रष्टाचारीहरुमाथि छानबिन गरेर कारबाही गर्नुको सट्टा छानबिन विना नै सफाइ दिने गरेको भन्दै आपत्ति जनाएको छ । नेपालको भ्रष्टाचारका बारेमा ट्रान्सपरेन्सी इन्टरनेसनलले हालै दिएको प्रतिवेदनप्रति ध्यानाकर्षण भएको राजमोले जनाएको छ ।
ट्रान्सपरेन्सीले नेपाल एशियामै भ्रष्टाचारमा पहिलो नम्बरमा पुगेको र सरकारकै संरक्षणमा भ्रष्टाचार हुने गरेको प्रतिवेदन सार्वजनिक गरेको थियो । सो प्रतिवेदनलाई सरकारले तथ्यहीन बताएर खारेज गर्ने बताएको थियो ।
अध्यक्ष चित्रबहादुर केसीले बिहीबार जारी गर्नुभएको वक्तव्यमा भ्रष्टाचारका काण्डमा मुछिएर सरकार झन् पछि झन् बद्नाम हुँदै गइरहेको अवस्थामा प्रतिगामीहरुलाई गणतन्त्र र धर्म निरपेक्षताका विरुद्ध गतिविधि बढाउन मद्दत पुगेको बताउनुभएको छ ।
‘ट्रान्सपरेन्सी इन्टर नेशनलले नेपालको भ्रष्टाचारको बारेमा दिएको प्रतिवेदनप्रति पनि राजमोको ध्यानाकर्षण भएको छ । प्रतिवेदनलाई सरकारले तथ्यहिन बताएर खारेज गरेको छ । तर वास्तविकता यो हो कि नेपालमा उच्च राजनीतिक स्तरमा नै भ्रष्टाचार बढ्ने मात्र गरेको छैन, स्वयं प्रधानमन्त्री र सरकारले त्यसप्रकारका काण्डहरुमा छानबिन गरेर दोषीलाई कारबाही गर्नुको सट्टा छानबिन विना नै आरोपित व्यक्तिलाई सफाइ दिने गरेको पाइन्छ’ अध्यक्ष केसीद्वार जारी वक्तव्यमा भनिएको छ, ‘अख्तियारले पनि भ्रष्टाचारीलाई कारबाही गरेको छैन । त्यसकारण नेपालमा भ्रष्टाचारको समस्या अत्यन्त गम्भीर बनेको छ ।’
वक्तव्यको पूर्णपाठ यहाँ हेर्नुहोस् : संघीयताको विकल्प राजतन्त्र होइन: केसी
वक्तव्यमा अगाडि भनिएको छ, ‘भ्रष्टाचारका काण्डमा मुछिएर सरकार झन्पछि झन् बद्नाम हुँदै गइरहेको अवस्थामा प्रतिगामीहरुलाई गणतन्त्र र धर्म निरपेक्षताका विरुद्ध गतिविधि बढाउन मद्दत पुगेको छ । त्यसकारण एकातिर गणतन्त्र धर्म निरपेक्षता र राष्ट्रियताको रक्षाको लागि अर्कातर्फ संघीयताको खारेजी र भ्रष्टाचारको विरुद्धमा व्यापक रुपमा जनमत तयार गर्दैै जनआन्दोलनलाई सशक्त पार्नु आजको आवश्यकता हो ।’
