काठमाडौं । प्रधानमन्त्री केपी शर्मा ओलीले देश चलाउने पार्टीको शीर्ष ठाउँ प्रदुषित भएको र मानिसहरुले घृणा गर्न थालेको बताउनुभएको छ ।
नेकपाका अध्यक्ष ओलीले मंसिर १३ गते बसेको पार्टी सचिवालय बैठकमा अर्का अध्यक्ष प्रचण्डले पेश गरेको प्रतिवेदनको जवाफ दिँदै नेकपाको शीर्ष नेतृत्व तहलाई दुषित बनाइएको र मानिसहरुले घृणाभाव प्रकट गर्न थालेको बताउनुभएको हो ।
ओलीको प्रतिवेदनमा भनिएको छ, ‘एकढंगले भन्ने हो भने हामी एउटा देश चलाउने पार्टीको यस्तो शीर्ष ठाउँमा छौं । यस शीर्ष ठाउँलाई यति प्रदूषित गरिएको छ, आज मान्छेले यस ठाउँप्रति नै घृणाभाव प्रकट गर्न थालिसकेका छन् ।’
देश बनाउने ठाउँको नेतृत्वपंक्तिप्रति सबै आकर्षित र उत्साहित भएर काममा जुट्ने अवस्था हुनुपर्नेमा आफैँले फैलाएको कुप्रचारबाट आफैँ प्रदूषित भएको प्रतिवेदनमा उल्लेख छ ।
‘देश बनाउने ठाउँको नेतृत्व गर्ने, नेतृत्वपूञ्ज रहेको यो ठाउँ यसरी दुषित बनाइएको छ, जबकि यसले त सुगन्ध फैलाउनु पर्दथ्यो, यसले ‘म्याग्नेट’ को काम गर्नुपर्दथ्यो । वरिपरी सबै आकर्षित र उत्साहित भएर काममा जुट्ने अवस्था हुनुपर्दथ्यो’ ओलीले भन्नुभएको छ, ‘तर आज स्थिति त्यस्तो छैन । हामी आफ्नै प्रचार, आफैँले फैलाएका कुप्रचारबाट आफैँ आक्रान्त भएर प्रदूषित भएका छौं ।’
प्रधानमन्त्री ओलीले प्रचण्डप्रति लक्षित गर्दै पार्टीका विषयबस्तु कसरी मान्छे जम्मा गर्न सकिन्छ ? कसरी झूठफरेव फिजाउन सकिन्छ ? कसरी भ्रममा पार्न सकिन्छ र मान्छेहरूलाई कसरी आफ्नो पक्षमा ल्याउन सकिन्छ र तथाकथित बहुमत कसरी पुर्याउन सकिन्छ ? त्यसमा केन्द्रित रहेको बताउनुभएको छ ।
प्रचण्डको प्रतिवेदनलाई ‘आरोपपत्र, अभियोगपत्र र लाञ्छनापत्र’ को संज्ञा दिँदै त्यो फिर्ता लिएर त्यसको गलत प्रचार गरेकोमा क्षमायाचना गर्नुपर्नेमा ओलीको जोड छ ।
